Россия Макронни Москвага ядровий таҳдид қилишда айблади

Франция Президенти Эммануэль Макрон замонавий Россия бутун Европа, жумладан, Франция учун таҳдидга айланганини ва у Украинада тўхтаб қолишига ҳеч қандай асос кўрмаётганини айтганди. Россия Ташқи ишлар вазирлиги Макроннинг баёноти ортидан Парижни расмий Москвага ядровий таҳдид қилишда айблади. Бу ҳақда вазирлик матбуот хизмати хабар берди.

“Украина атрофидаги инқироз ва Россия билан қарама-қаршиликка бағишланган ЕИ саммити арафасида Франция Президенти Макрон Россияга қарши ўта агрессив нутқ сўзлади. Мамлакатимизни яна бир бор “Франция ва Европага таҳдид” деб билган ҳолда, у одатдагидек уни ҳеч қандай далилсиз барча ўлимли гуноҳларда айблади – киберҳужумлар ва сайловларга аралашишдан тортиб, бошқа Европа давлатларига деярли ҳужум қилиш истагигача”, дейилган вазирлик хабарида.

Вазирликнинг ёзишича, Макроннинг нутқи Украина учун хавфсизлик кафолатларини таъминлашга қаратилган. Россия учун хавфсизлик кафолатлари ҳақида эса бир оғиз ҳам сўз йўқ.

north_east

Макрон ўзи ва Стармернинг “Украина режаси”ни ошкор қилди

“Аммо айнан шундай кафолатларнинг йўқлиги, Ғарб томонидан мамлакатимиз учун доимий таҳдидлар яратилиши, биринчи навбатда, НАТОнинг чексиз кенгайиши – берилган ваъдаларга зид равишда Украинани Россияга қарши кўприкка айлантириш истаги ҳозирги инқирозга олиб келди. Ғарб етакчилари, жумладан Макроннинг ўзи ҳам бу ҳақда қайта-қайта ва узоқ йиллар давомида огоҳлантирилган. Яна бир бор амин бўлдикки, Париж ҳали ҳам мамлакатимизнинг ҳаётий манфаатларини инобатга олмоқчи эмас ва бор эътиборини Ғарбга зарур бўлган қарорларни қабул қилишга “мажбурлаш”га қаратган. Бундан ҳеч нарса чиқмайди, албатта”, дейди Россия ТИВ.

Россия Франция раҳбарининг Москвага йўллаган нутқини ўз мамлакати ичидаги мавжуд муаммолар билан боғлиқлигини қайд этган.

“Франция Президентининг нутқи ўз мамлакатининг ички ташвишлари билан боғлиқ. Бунинг ортида ўз аҳолисини Франция ва умуман Европа Иттифоқидаги оғирлашиб бораётган ижтимоий-иқтисодий муаммолардан чалғитиш, ўз эътиборини ташқи таҳдидларга қаратиш ва ўтган йил давомида пасайиб кетган сиёсий позицияларини қандайдир тарзда мустаҳкамлаш истаги бор”, дейди вазирлик.

Макроннинг сўзларига кўра, Россия аллақачон Украинага қарши жаҳон миқёсидаги урушнинг чизмаларини бериб, КХДРдан қўшинлар ва Эрон қуролларини олиб келган, шу билан бирга, Россия Пхеньян ва Теҳронга бир вақтнинг ўзида ёрдам бериб, Кремлнинг Европадаги мухолифларини ўлдиришдан тортинмаяпти, сайловларга аралашмоқда, киберҳужумларни амалга оширмоқда, ижтимоий тармоқларда ёлғон ахборот тарқатиш орқали жамоатчилик фикрини манипуляция қилишга уринмоқда.