Россия дрони Киевдаги Фанлар академияси биносига урилди (видео)

Бугун, 28 сентябрь куни Киев марказида Россия дрони Украина Миллий фанлар академияси биносига бориб урилди. Бу ҳақда “Украинская правда” хабар берди.

Маълум қилинишича, зарба оқибатида бинода ёнғин чиқиб, камида бир нафар аёл ҳалок бўлган. Маҳаллий ҳокимият маълумотига кўра, ҳужум оқибатида яраланганлар ҳам бор. Ижтимоий тармоқларда тарқалган видеоларда ҳужум пайтида бино ичида одамлар бўлгани кўринади. Улар ёнғин ичида қолган бинодан деразалар орқали чиқишга уринган.

Нашрга кўра, Фанлар академияси биносидан тахминан 300 метр масофада Германия элчихонаси ва “Укртелеком” компанияси офиси жойлашган. Украина Президенти Владимир Зеленский ҳам ҳужум ҳақида баёнот берди.

“Россиянинг Украина Фанлар академияси биносига ҳужуми. Ҳозир қутқарув ишлари олиб борилмоқда, ёнғин ўчирилмоқда, бинода бўлиши мумкин бўлган одамлар қидирилмоқда. Барча хизматлар жалб этилган”, деб ёзган Зеленский ўзининг Telegram-каналида.

Унинг қайд этишича, бугун Киевда фармацевтика компанияси ва бензин тўлдириш шохобчаларига, Днепрда эса бизнес марказига ҳужум қилинган. Бошқа шаҳарлар ва ҳудудларда фуқаролик объектлари, корхоналар ва алоқа объектлари нишонга олинган.

“Афсуски, ҳалок бўлганлар ҳам бор. Менинг чуқур ҳамдардлигимни уларнинг оила аъзолари ва яқинларига етказаман”, деган Украина Президенти.

Шунингдек, Зеленский Россия ушбу ҳужумлар учун жавоб бериши кераклигини ҳам таъкидлаган.

“Украина ҳамкорларининг ҳар бири бу ваҳшийлик ва бундай ҳужумлар орқали қуйидаги нарсани тушуниши керак: Украинага кўмак бериш — бу одамларнинг ҳаётини қўллаб-қувватлаш, террор ҳеч қачон ва ҳеч жойда нормаллаштирилмаслиги керак”, деб ёзган у.

Унинг сўзларига кўра, Россия содир этган барча ҳужумлари учун жавоб бериши ва ҳақиқий оқибатларга дуч келиши керак.

Маълумот учун, Киевдаги Украина Миллий Фанлар академияси Президиуми биноси миллий аҳамиятга эга тарихий ёдгорлик ҳисобланади. 1850 йилларда қурилган ушбу бино 1919 йилда Украина Фанлар академиясига ўтказилган. 1918 йилда ташкил этилган Украина Миллий Фанлар академияси мамлакатнинг энг юқори илмий ташкилоти бўлиб, табиий, техник, ижтимоий ва гуманитар фанлар бўйича тадқиқотларни олиб боради. Тўлиқ кўламли уруш даврида академиянинг 300 дан ортиқ объекти вайрон қилинган ёки шикастланган.

Эслатиб ўтамиз, аввалроқ Россиянинг Украинага қилган ҳужумлари оқибатида Суми ва Харков шаҳарларида уч киши, Киев яқинидаги бозорга зарба берилиши натижасида эса яна икки киши ҳалок бўлган эди.