Россия бир суткада Украинанинг 25 та дронини йўқ қилди

Россия Қуролли кучларининг ҳаво мудофаа тизимлари бир кунда саккизта HIMARS снарядларини тутиб олди, 25 та дронни йўқ қилди. Бу ҳақда Россия Федерацияси Мудофаа вазирлиги расмий вакили, генерал-лейтенант Игорь Конашенков маълум қилди.

"Кун давомида ҳаво ҳужумига қарши мудофаа тизимлари HIMARS кўп учирувчи ракета тизимининг саккизта ракетасини тутиб олди. Бундан ташқари, (тан олинмаган) Луганск Халқ Республикасининг Кременная, Рубижное, Золотарёвка, (тан олинмаган) Донецк Халқ Республикасининг Трудовское, Горловка, Запорожье вилоятининг Чапаевка ва Очеретоватое аҳоли пунктлари ҳудудларида Украинанинг 25 та учувчисиз самолётлари йўқ қилинди", деган у.

Шунингдек, Конашенков Россия қирувчи самолёти Украина ҳарбий-ҳаво кучларининг Ми-8 вертолётини уриб туширганини айтган.

Эслатиб ўтамиз, жорий йилнинг 10 августида Украина Қримга дрон учирган, шулардан иккитаси Севастополь шаҳри яқинида навбатчи ҳаво ҳужумига қарши мудофаа тизимлари томонидан уриб туширилган бўлса, яна 9 таси нишонга етиб бормай, Қора денгизга қулаганди. 1, 6, 9, 10 ва 11 август кунлари эса Россия пойтахти Москвага дрон ҳужуми уюштирилганди. Бунга жавобан 2 августга ўтар кечаси Киевга, 8 августда Покровскка, 9 августда Запорожье шаҳрига ва 11 августда Киев вилоятига ҳаво ҳужуми уюштирилди.