Россия билан чегарани очмаймиз – Финляндия

Кеча, 3 февраль куни Финляндия Бош вазири Петтери Орпо Россия чегарасида ўтиш пунктларини очишни режалаштирмаганликларини айтди. У бу ҳақда YLe телеканалидаги дастурлардан бирида қилган чиқишида маълум қилди.

Россия ҳудудидаги минглаб қочқинлар чегаранинг шарқида кутиб турганини ва мақсади Финляндияга ноқонуний йўллар билан кириш эканлигини иддао қилган Орпо, чегара очилмаслигини қатъий таъкидлади.

 "Чегарани ёпиш қароримизни бекор қила олмаслигимиз аниқ", деган Бош вазир.

Финляндия 2023 йилнинг 9 ноябридан бошлаб қочқинларнинг назоратсиз оқими туфайли Россиядан киришга чекловлар жорий қила бошлади. Бу қарорга асос сифатида Ҳельсинки Россияни қочқинларни чегарага атайлаб жўнатганликда айблади.

Эслатиб ўтамиз, Финляндия ҳукумати қарори билан Россия Федерацияси билан чегарадаги барча автомобиль назорат пунктлари 2023 йил 30 ноябрдан 14 декабргача ёпилган эди. Шундан сўнг иккита назорат-ўтказиш пунктигина очилди, бироқ учинчи давлатлардан муҳожирларнинг қайта оқими туфайли чегара яна 2023 йил 15 декабрдан 2024 йил 11 февралгача ёпилгани маълум қилинди.