Россия бензин ва авиакеросин экспортини тўлиқ тақиқлади

Россияда бензин ва авиация керосини экспортига вақтинчалик тўлиқ тақиқ жорий этилди. Бу ҳақда мамлакат Президенти Владимир Путин ҳукумат аъзолари ва йирик энергетика компаниялари раҳбарлари билан ўтказилган йиғилишда маълум қилди.

Унинг сўзларига кўра, ушбу чеклов ички бозорни барқарорлаштириш ҳамда фуқаролар, корхоналар ва ижтимоий аҳамиятга молик ташкилотларга ёнилғини узлуксиз етказиб беришни таъминлаш мақсадида қабул қилинган.

Ҳукумат худди шундай тақиқни дизель ёнилғиси экспортига ҳам жорий этиш имкониятини кўриб чиқмоқда.

Владимир Путин Россия нефтьни қайта ишлаш заводлари максимал қувватда ишлаётганини, режали таъмирлаш ишларининг бир қисми эса кечироқ муддатга кўчирилганини қайд этган. Прогнозларга кўра, аллақачон июль ойида асосий ёнилғи турларини ишлаб чиқариш июнь кўрсаткичларидан юқори бўлади.

Президент, шунингдек, Россияда бензин захиралари тахминан 1,7 миллион тоннани ташкил этаётганини – бу деярли ўтган йилги даражада эканини маълум қилган. Шунга қарамай, айрим ҳудудларда ёнилғи қуйиш шохобчаларида навбатлар ва айрим маркадаги ёнилғилар таъминотида узилишлар сақланиб қолмоқда. Вазиятни назорат қилиш учун ҳукумат тун-у кун ишлайдиган махсус штаб тузган.

Россия Президенти матбуот котиби Дмитрий Песков ҳукумат бир қатор давлатлар билан нефть маҳсулотлари ишлаб чиқариш ва импорт қилиш бўйича музокаралар олиб бораётганини маълум қилган. Унинг сўзларига кўра, агар мақбул нархларда етказиб бериш бўйича келишувга эришилса, бу бозорни барқарорлаштириш ва ортиқча талабни камайтириш учун қўшимча чора бўлиши мумкин.

Шу билан бирга, у айнан қайси давлатлар потенциал етказиб берувчи сифатида кўрилаётганига аниқлик киритмаган.

Дмитрий Песков ёнилғи бозоридаги вазият доимий назоратда эканини ҳам қайд этган: соҳавий йиғилишлар ҳар куни ўтказилмоқда, вице-премьер Александр Новак бошчилигидаги ҳукумат ишчи гуруҳи эса ушбу масала билан кундалик режимда шуғулланмоқда.

Эслатиб ўтамиз, аввалроқ Россия ички бозордаги ёнилғи тақчиллиги сабабли Қозоғистон билан тахминан 50 минг тонна ҳажмдаги AI-92 автобензинини импорт қилиш имконияти бўйича музокаралар олиб бораётгани ҳақида хабар берилган эди.