Россия Қозоғистондан бензин сўради

Россия ички бозордаги ёнилғи тақчиллиги сабабли Қозоғистон билан тахминан 50 минг тонна ҳажмдаги AI-92 автобензинини импорт қилиш имконияти бўйича музокаралар олиб бормоқда. Бу ҳақда соҳадаги тўртта манбага таяниб, “Reuters” хабар берди.

Манбалардан бирининг сўзларига кўра, Россия нефтини Қозоғистоннинг нефтни қайта ишлаш заводларидан (НҚЗ) бирига толлинг шартлари асосида етказиб бериш варианти муҳокама қилинмоқда. Айни пайтда Қозоғистонда автобензин профицити кузатилмоқда, бироқ 26 июндан 20 июлгача Атирау НҚЗ таъмирлаш учун ўз фаолиятини тўхтатади, бу эса маҳсулот захираларини қисқартиради. 

“Қозоғистон билан музокаралар олиб боряпмиз, лекин умид кам”, дея шикоят қилган “Reuters” манбаси. 

Агентлик манбаларининг фикрича, ягона имконият – Қозоғистоннинг “Конденсат” заводидан импорт қилишдир. Ушбу корхона Россиянинг “Танеко” НҚЗсида ишлаб чиқарилган газ конденсати дистиллятини қайта ишлайди ва ёнилғини эркин сотиш учун ҳар ой Энергетика вазирлигидан квота оладиган ягона Қозоғистон НҚЗси ҳисобланади.

“Reuters”нинг Қозоғистондаги манбасига кўра, Россия Федерациясига автобензин етказиб бериш Россия авиакеросини импорти эвазига амалга оширилиши мумкин. Қозоғистон июль ойида талабнинг ортиши, Атирау НҚЗсидаги профилактика ишлари ва импортнинг камайиши фонида авиакеросин тақчиллигига дуч келган. Соҳа вакилларининг маълумотларига кўра, Россия авиакеросин экспортини Қозоғистонга ҳам кескин камайтирган.

“РФдан импорт катта эҳтимол билан бўлмайди, усиз эса эҳтиёжларни ҳам қондириб бўлмайди”,  дейди манба.

Маълумот учун, марказий Россиядаги бир қатор йирик НҚЗларнинг учувчисиз учиш аппаратлари ҳужумлари туфайли тўхтаб қолгани июнь ойининг иккинчи ўн кунлиги охирига келиб автобензин ишлаб чиқаришни ўтган йилнинг июнь ойига нисбатан 25 фоизга камайишига олиб келган. “Reuters” маълумотларига кўра, бензин ишлаб чиқариш кунига 85 минг тоннагача қисқарган, ваҳоланки, ёз ойларида истеъмол кунига 110 минг тоннага етади.

Ёнилғи тақчиллигига қарши курашда Россия ҳукумати НҚЗларга ички бозор учун сифат кўрсаткичлари пасайтирилган автобензин ва дизель ёнилғиси чиқаришга рухсат берган. Бундан ташқари, шу ойда Россия бензинни денгиз йўли орқали импорт қилишни режалаштирмоқда.

Эслатиб ўтамиз, аввалроқ Россиянинг Новосибирск, Белгород, Кемерово, Тюмен, Вологда, Пенза вилоятлари ва Ханти-Мансийск автоном округи расмийлари ёнилғи сотишга лимитлар жорий этилганини эълон қилгани ҳақида хабар берилган эди.