Россиянинг яна 7 та ҳудудида бензин сотишга лимит жорий этилди

Россиянинг Новосибирск, Белгород, Кемерово, Тюмен, Вологда, Пенза вилоятлари ва Ханти-Мансийск автоном округи расмийлари ёнилғи сотишга лимитлар жорий этилганини эълон қилди. Чекловлар ҳақида губернаторлар ва минтақавий Вазирлар Маҳкамалари хабар берган.

Қайд этилишича, Вологда вилоятидаги “Лукойл” ёнилғи қуйиш шохобчаларида (АЁҚШ) лимитлар белгиланган: битта автомобиль учун 30 литрдан кўп бўлмаган бензин ва 60 литр дизель, трассаларда эса 200 литргача дизель берилмоқда. Белгород вилоятида “Роснефть” АЁҚШларида бензинни канистраларга сотиш тақиқланган, “Лукойл” шохобчаларида 30 литр бензин ва 60 литр дизель чеклови амал қилмоқда, “Газпром нефть” станцияларида эса AI-95 бензини сотилмаяпти.

Тюмен вилоятидаги “Газпромнефть” АЁҚШларида 40 литр бензин ва 80 литр дизель (трассаларда – 40 литргача бензин ва 200 литргача дизель) лимити амал қилмоқда, канистраларга ёнилғи қуйиш тақиқланган. Пенза вилоятида бакка 100 литргача бензин ва 200 литр дизель қуйишга рухсат берилган. Кузбасс (Кемерово), ХМАО ва Новосибирск вилоятида расмийлар лимитларнинг аниқ кўрсаткичларини очиқламаган ва аҳолини ваҳима юзага келтирмасликка чақирган.

Эслатиб ўтамиз, аввалроқ Қримдаги барча автомобилларга ёқилғи қуйиш шохобчаларида бензин сотуви ҳам эркин тарзда, ҳам талонлар бўйича тўлиқ тўхтатилгани ҳақида хабар берилган эди.