Россия армиясининг йўқотишлари 900 минг кишига етди – разведка

2022 йилда Украинага бошланган тўлиқ ҳажмдаги босқинидан буён Россия армияси, Британия разведкаси маълумотларига кўра, ўлдирилган ва яраланганларни қўшиб ҳисоблаганда қарийб 900 000 кишини йўқотган бўлиши мумкин. Бу ҳақда Буюк Британия Мудофаа вазирлигининг Х ижтимоий тармоғида эълон қилинган ҳисоботида сўз боради.

Лондонда берилган баҳоларга кўра, Россия армиясида ҳалок бўлган ҳарбий хизматчилар сони 200 000 дан 250 000 нафаргача бўлиб, бу йўқотишлар Иккинчи жаҳон урушидан бери Россия учун энг йирик йўқотишлар ҳисобланади.

Ҳисоботга кўра, Россия раҳбарияти, жумладан Президент Владимир Путин уруш мақсадларини ўз аскарлари ҳаётидан устун қўймоқда. Ҳужжатда Кремль урушга аҳолининг ва элитанинг қўллаб-қувватлаши пасаймагунча ҳамда йўқотишларни қоплаш имконияти бўлар экан, юқори даражадаги талафотларга кўнишга тайёр экани таъкидланган. Айниқса, Россия ҳукумати қашшоқ ҳудудлардаги этник озчилик вакиллари ҳаётига камроқ эътибор қаратаётгани, оқибатда асосан ана шу ҳудудлардан келган аскарлар сафарбар қилинаётгани қайд этилган.

Пентагон маълумотларига кўра, 2024 йил ноябрь ҳолатига кўра, Россия армиясида жами ҳалок бўлган ва жароҳатланган ҳарбийларнинг сони 615 000 кишини ташкил этган, улардан 115 000 нафари ҳалок бўлган, 500 000 нафари эса яраланган. Британия Мудофаа вазирлиги ўша пайтда Россиянинг умумий йўқотишларини 610 000 киши деб баҳолаган бўлиб, шундан 200 000 нафари ҳалок бўлган, 400 000 нафари эса жароҳат олган. 2024 йил июнь ойида Владимир Путин Россия 27 ой ичида 135 000 кишини йўқотганини билдирган.

Жорий йил февраль ойи охирида BBC рус хизмати ва “Медиазона” мустақил равишда уруш бошланганидан бери ҳалок бўлган 95 026 нафар россиялик аскар ва офицернинг шахсини аниқлаганди. Фақатгина 24 январдан 21 февралгача бўлган даврда рўйхат яна 5007 киши билан тўлдирилган. Нашр маълумотларига кўра, ўзини ўзи мустақил деб эълон қилган ДХР ва ЛХР ҳарбий тузилмалари сафида уч йил ичида 21 000-23 500 киши ҳалок бўлган, уларнинг аксарияти мажбуран сафарбар этилган. Журналистлар ҳақиқий йўқотишлар 146 194 дан 211 169 нафаргача бўлиши мумкинлигини тахмин қилган, ДХР ва ЛХР ҳарбийлари ҳисобга олинса, бу кўрсаткич 167 194 дан 234 669 нафаргача етиши мумкин.

Ҳарбий таҳлилчи Юрий Фёдоровнинг февраль охиридаги ҳисоб-китобларига кўра, Россия армиясининг қайтариб бўлмайдиган йўқотишлари уруш бошланган пайтдаги шахсий таркибининг деярли ярмига етган. У Халқаро стратегик тадқиқотлар институти (IISS) маълумотларига таяниб, 2025 йил бошига келиб Россия Қуролли кучларининг 172 000 кишиси ҳалок бўлган, 611 000 кишиси эса яраланган деб баҳолаган. Ярадорларнинг 235 000 нафари қайта хизматга қайтган, аммо 376 000 нафари оғир жароҳатлар олиб, хизматни давом эттира олмаган. Шу тариқа, Фёдоров Россия армиясининг қайтариб бўлмайдиган йўқотишларини 550 000 киши деб баҳолаган, бу эса бутун ҳарбий денгиз флоти ва ҳаво кучларини ҳам ўз ичига олган ҳолда, Россия Қуролли кучлари таркибининг қарийб ярмига тенг. https://qalampir.uz/news/ukraina-bilan-urushda-k-ariyb-400-ming-rossiyalik-askar-nogironga-aylandi-114396

Эслатиб ўтамиз, аввалроқ ўтган йил давомида Украинадаги жанговар ҳаракатлар оқибатида бедарак йўқолганлар сони икки баравардан кўпроқ ошиб, 50 минг кишига етгани хабар қилинганди. Унга кўра, Украинада бедарак йўқолганларнинг қарийб 90 фоизи ҳарбий хизматчилар ҳисобланади.