Роналду жорий йил якунида фаолиятини тугатиши мумкин

Португалиялик футбол юлдузи Криштиану Роналду жорий йил якунидан сўнг профессионал фаолиятини якунлаши мумкин. Бу ҳақда Португалия терма жамоаси сардори “Vogue” журналига берган интервьюсида маълум қилди.

“Бу менинг футболдаги сўнгги йилим бўлса керак ва мен катта мерос қолдирмоқчиман. Мен нафақага чиққанимдан кейин нима қилишимни аллақачон биламан. Режаларим жуда кўп, шунинг учун фақат биттасини ажратиб кўрсатиш қийин”,  дейди футболчи.

Роналду фаолиятини якунлаганидан сўнг кўпроқ дам олиш, саёҳат қилиш ва ўзига ёқадиган падел спорти билан шуғулланишни хоҳлашини айтди.

“Мен кўпроқ дам олишни, саёҳат қилишни, падел томоша қилишни ва ўйнашни хоҳлайман. Бу менга жуда ёқади. Шунингдек, эришган барча ютуқларимдан завқланмоқчиман. Ахир, мен 25 йиллик фаолиятимни ортда қолдирдим. Бу давр кўплаб қурбонликлар ва қийинчиликларни ўз ичига олган”,  дея қўшимча қилди Роналду.

Маълумот учун, Криштиану Роналду профессионал футболидаги илк расмий учрашувини 2002 йил 14 август куни “Спортинг” Лиссабон сафида “Интер”га қарши ўтказган.

Эслатиб ўтамиз, аввалроқ 41 ёшли Роналду 2016 йилдан буён муносабатда бўлиб келаётган Жоржина Родригес билан турмуш қурди.