Роналду ЖЧ-2022дан сўнг “Реал”дан таклиф кутди

Саудия Арабистонининг "Ал-Наср" клубига ўтган ҳужумчи Криштиану Роналду янги клуби билан шартнома имзолагунга қадар "Реал"дан таклиф кутган. Бу ҳақда "Marca" нашри хабар берди.

Манбага кўра, 37 ёшли португалиялик ўзининг жисмоний формасини сақлаш учун Валдебебасдаги жамоа базасига қайтганида клуб раҳбариятидан эҳтимолий ҳамкорлик борасида қўнғироқ кутган. Қайд этилишича, ҳужумчининг ўзи Европанинг юқори даражасига қайтиш имконияти пастлигини тушунган.

Роналду якуний қарорни "Ал-Наср" ҳужумчи билан 2025 йилгача рекорд даражадаги шартнома тузиш учун ички кадрлар муаммоларини ҳал қилишга муваффақ бўлганидан кейин қабул қилди.

Аввалроқ, Роналду янги клубида йилига 200 миллион евро маош олиши ҳақида хабар берилганди. 90 миллион евро португалияликнинг кафолатланган маоши, қолгани эса рекламадан тушган даромад ҳисобланади. Тижорий чегирмалар аллақачон футболчи вакиллари билан келишилган.