Роналду нега ўз вақтида “Барселона”га ўтмаганини изоҳлади

Саудия Арабистонининг “Ал-Наср” клуби ҳужумчиси Криштиану Роналду нега фаолиятининг бошида Лиссабоннинг “Спортинг” клубидан Каталониянинг “Барселона” клубига ўтмаганини тушунтириб берди.

“Спортинг”да ўйнаганимда “Барселона”га ўтишим мумкин эди. Улар мен билан шартнома имзолашни хоҳлади, лекин бундай бўлмади, чунки “Барселона” мен билан шартнома имзолаб, кейинги йил мени Каталонияга олиб кетмоқчи эди.  “Манчестер Юнайтед” эса мени дарҳол олиб кетди”, дейди Роналду.

Қайд этиш жоиз, 5 февраль куни 40 ёшни қарши оладиган Роналду 2001-2003 йилларда “Спортинг” клуби сафида тўп тепган. 2003 йилда португалиялик футболчи Англиянинг “Манчестер Юнайтед” клубига кўчиб ўтган. 

39 ёшли Роналдунинг Саудия клуби билан амалдаги шартномаси 2025 йилнинг ёзига қадар тузилган. “Transfermarkt” порталида келтирилган маълумотларга кўра, футболчининг бозор қиймати 12 миллион еврони ташкил қилади.

Эслатиб ўтамиз, аввалроқ Криштиану тарихдаги энг яхши футболчи ким эканлигини маълум қилганди.