Роналду дунёнинг энг яхши клуби қайси эканини айтди

“Ал-Наср”нинг португалиялик ҳужумчиси Криштиану Роналду 2009 йилдан 2018 йилгача ўйнаган “Реал Мадрид”ни футбол тарихидаги энг яхши клуб ҳисоблайди. Бу ҳақда футболчининг ўзи шахсий YouTube каналидаги видеоларидан бирида айтиб ўтди.

“Реал” кучли жамоа бўлиб кўринади. Бу жамоа босим остида ўзини йўқотиб қўймайди. Кўпчилик “Реал”ни Европа Чемпионлар лигасида омадли жамоа деб айтади. Йўқ, улар омадлимас, “Реал” ҳақиқатдан ҳам ўзига хос характерга эга жамоа. “Сантьяго Бернабеу”да бошқача аура ва энергия бор. Мен учун бу футбол тарихидаги энг яхши клуб”, дейди Роналду.

Шунингдек, Криштиану “Реал”га ўтганини эслаб, жамоанинг етакчисига айланиб олиши осон кечмаганини билдирди.

“Трансфердан олдин босимга бардош бера олишимни билардим. Мен ўз маҳоратим, кучим ва истеъдодимга ишондим. Бу осон бўлмади, чунки  бошқа давлат, мен эндигина 24 ёшда эдим. “Реал Мадрид” дунёнинг энг яхши клуби. “Манчестер Юнайтед”да бўлгани каби, бу клубда ҳам тарих ёзаман, дегандим. “Реал” мен учун жуда катта синов бўлди ва мен “қироллик клуби”да ўйнаганимдан хурсандман”, дейди Роналду.

Қайд этиш жоиз, Криштиану Роналду яқинда расмий ўйинларда 901 та гол урган тарихдаги биринчи футболчи бўлди. Роналду “Спортинг”да 5 та, “Манчестер Юнайтед”да 145 та, “Реал”да 450 та, “Ювентус”да 101 та, “Ал-Наср”да 68 та ва миллий терма жамоага 132 та тўп киритган. Ҳужумчи футбол, ​​миллий терма жамоалар, Европа чемпионати, Европа Чемпионлар лигаси ва клублар ўртасидаги Жаҳон чемпионати тарихидаги энг яхши тўпурар ҳисобланади.