Robotlar ishtirokida ilk futbol o‘yini bo‘lib o‘tdi

Xitoyda robotlar ishtirokida dunyodagi birinchi futbol o‘yini o‘tkazildi. Bu haqda “Independent” xabar berdi.

Butunlay avtonom tarzda o‘tgan ushbu futbol o‘yinida faqat sun’iy intellekt tomonidan boshqariluvchi gumanoid robotlar qatnashgan. Ular ilg‘or vizual sensorlar bilan jihozlangan bo‘lib, to‘pni aniqlay olish, maydonda harakatlanish va yiqilgach, o‘z-o‘zidan turib ketish imkoniyatiga ega edi.

Biroq hamma robotlar bu vazifani uddalay olmagan. Ulardan ikki nafari “hushini yo‘qotib”, ya’ni harakatga javob bermay qo‘ygach, maydondan olib chiqib ketilgan. 

O‘yin ko‘plab kulgili voqealarga boy bo‘lgan va texnik xatoliklar yuz bergan. Robotlar sekin harakatlangan, bir-biriga urilgan, ba’zida esa yo‘nalishni yo‘qotgan. Shunga qaramay, tashkilotchilar robotlar tomonidan atrofni anglash va qaror qabul qilish texnologiyalarida katta siljishlar kuzatilganini ta’kidlagan.

Booster Robotics kompaniyasi asoschisi Chen Hao bu kabi sport musobaqalari gumanoyid robotlar uchun mukammal sinov maydonchasi ekanini aytgan. U, shuningdek, kelajakda robotlar va odamlar birgalikda xavfsiz futbol o‘yinida ishtirok etishlari mumkinligini ham aytib o‘tgan.

Tadbir tashkilotchilari bu kabi musobaqalar sun’iy intellekt va gumanoyid robotlar imkoniyatlari haqida jamoatchilikni xabardor qilishga xizmat qilishini ta’kidlagan.

Eslatib o‘tamiz, avvalroq Xitoyda robotlar o‘rtasida dunyodagi ilk boks turniri ham bo‘lib o‘tgan edi.