Рингдан сиёсатга. Макгрегор президент бўлмоқчи

Ирландиялик профессионал аралаш жанг устаси, собиқ UFC чемпиони Конор Макгрегор 2025 йилдаги президентлик сайловларида номзодини қўймоқчи. У бу ҳақида ўзининг Х (собиқ Twitter) ижтимоий тармоғидаги саҳифасида маълум қилди.

Спортчининг қайд этишича, агар у сайловда ғалаба қозонса, у эмас, балки, бутун Ирландия халқи ҳокимият тепасига келади. 

Макгрегор рақиблари ҳақида фикр юритар экан, ўзини “камтарлик” билан мақташни ҳам унутмади:

“Жерри Адам – 78 ёш, Берти Аҳерн – 75 ёш, Энда Кенни – 74 ёш. Улар партияларидан ташқаридаги жамоатчилик ўзини қандай ҳис қилишидан қатъи назар ўз партиясининг сиёсати билангина боғланиб қолган. Улар халқни эмас, кўпроқ ўзларини ўйлайди. Бошқа тарафда эса мана мен борман. 35 ёшдаман – ўйинда ёш, фаол, эҳтиросли, қони қайноқ, эшита олувчи, қўллаб-қувватловчи ва мослашувчан”, дейди Макгрегор.

У ўзининг тарафсизлиги, ҳеч бир партияга аъзо эмаслигини алоҳида урғулаган. 

“Менда ҳеч қандай партиявийлик, тарафкашлик ёки тарафдорлик йўқ. Агар  ғалаба қозонсам президент сифатида ҳокимият тепасида мен эмас, Ирландия халқи бўлади. Бу мен ва сиз дегани”, дейди спортчи.

Бир кун аввал эса Макгрегор ижтимоий тармоқларга қўйган сурати остига “Ирландия, сизнинг президентингиз” деган ёзув билан пост жойлаганди. 

Маълумот учун, Ирландияни 2011 йилдан буён Президент Майкл Хиггинс бошқариб келмоқда ва 82 ёшда. Мамлакатда келгуси президент сайлови 2025 йилда бўлиб ўтади.

Эслатиб ўтамиз, америкалик актёр Арнольд Шварценеггер ҳам АҚШда бўлиб ўтадиган навбатдаги сайловларда иштирок этмоқчи эканлигини билдирганди.