Расман: Европа Суперлигаси лойиҳаси тугади

Европа Суперлигаси деб аталган лойиҳа энди мавжуд эмас. Бу ҳақда Мадриднинг “Реал” клуби расмий сайтида баёнот эълон қилди. 

Клуб матбуот хизматининг хабар беришича, “қаймоқранглар” UEFA ва Европа клублари ассоциацияси билан бир неча ой давом этган музокаралар якунида келишувга эришган. Томонлар клуб футболи манфаатларини таъминлайдиган ва спорт принципларига асосланган тамойилларни ҳурмат қиладиган, шунингдек клубларнинг узоқ муддатли барқарорлиги ҳамда мухлислар учун шароитларни яхшилашга қаратилган принципиал келишувга келган.

Баёнотда айтилишича, ушбу келишув Европа Суперлигаси билан боғлиқ суд-ҳуқуқ масалаларини якуний битим имзолангандан сўнг ҳал этиш учун асос бўлиб хизмат қилади.

Маълумот учун, Европа Суперлигаси (ESL) – Европанинг энг бой ва кучли футбол клублари иштирокида UEFA Чемпионлар Лигасига муқобил сифатида ташкил этилиши режалаштирилган мусобақа эди. Унинг асосий мақсади топ-клубларнинг даромадларини ошириш ва турнир бошқарувини UEFA’дан олиб, клубларнинг ўз қўлига бериш.

Лойиҳа илк бор 2021 йил апрель ойида 12 та клуб (Англия, Испания ва Италиядан) томонидан эълон қилинган эди. Бироқ мухлислар, футболчилар ва ҳукуматларнинг кескин норозилиги сабабли аксарият клублар 48 соат ичида лойиҳадан чиқиб кетди.

2023 йил декабрь ойида Европа Иттифоқи суди UEFA ва FIFA’нинг Суперлигани тақиқлаш ҳаракатларини ноқонуний деб топди. Бу қарор Суперлига ташкилотчиларига янги форматни таклиф қилиш имконини берди.

Янги режага кўра, турнир ёпиқ бўлмайди ва унда 64 та жамоа учта дивизионда (Star, Gold ва Blue) иштирок этиши, шунингдек, ўйинлар мухлислар учун бепул платформада трансляция қилиниши айтилган эди.

Эслатиб ўтамиз, ўтган ҳафта охирида “Барселона” ҳам Суперлига лойиҳасидан чиққанини эълон қилган эди. Шундан сўнг ушбу лойиҳада фақат “Реал”гина қолганди.