Ramzan Qodirovning 17 yoshli o‘g‘li IIV kuratori etib tayinlandi (video)

Checheniston rahbari Ramzan Qodirovning 17 yoshli o‘g‘li Adam Qodirov Ichki ishlar vazirligining mintaqaviy boshqarmasi kuratori etib tayinlandi. Bu haqda “Kavkaz.Realii” xabar berdi.

Checheniston IIVning yangi kuratori tanishtirilgandan so‘ng sakkiz nafar “mamlakat oldidagi xizmatlari bilan ajralib turgan xodimlarga” shaxsan medal topshirgan. Ular “Checheniston qahramoni” unvoniga sazovor bo‘lgan.

Tayinlovdan so‘ng Adam Qodirovning tavsiyasiga binoan Checheniston IIVning ichki xavfsizlik boshqarmasi tezkor-tergov bo‘limiga yangi rahbar tayinlangan. Ushbu lavozimni vazir yordamchisi Timur Musanguzov egallagan. Ichki ishlar vaziri Aslan Irasxanovning so‘zlariga ko‘ra, bunday qaror Checheniston rahbari topshirig‘i asosida qabul qilingan.

Ma’lumot uchun, joriy yilning fevral oyi oxirida hali voyaga yetmagan Adam Qodirovga Arab arbitraj sudi a’zosi guvohnomasi umrbod muddatga berilgan. Ushbu sud Arab davlatlari ligasi huzuridagi organ bo‘lib, tijoriy va iqtisodiy nizolarni, shu jumladan, davlatlararo nizolarni hal etish bilan shug‘ullanadi. Shuningdek, Adam Qodirovga “Liviya faxriy mehmoni” medali topshirilgan. Bu mukofot Checheniston delegatsiyasining Misrga tashrifi chog‘ida berilgan.

2024 yil oktyabr oyida Adam Qodirov Rossiya rekordlar kitobiga kiritilib, Rossiya hududi rahbarining eng yosh xavfsizlik xizmati boshlig‘i sifatida qayd etilgan. O‘shanda u 16 yoshda edi. U otasining xavfsizligini ta’minlash bo‘limi rahbari lavozimiga 2023 yil oxirida, 15 yoshida tayinlangan. 2023 yil aprelida esa Vladimir Putin nomidagi Rossiya maxsus kuchlar universitetining kuratori bo‘lgan.

2023 yilda Adam Qodirov Chechenistonda tashkil etilgan va Baysangur Binoevskiy nomi bilan ataluvchi Rossiya Mudofaa vazirligining maxsus bataloni kuratori lavozimiga tayinlangan.

Eslatib o‘tamiz, avvalroq Ramzan Qodirovning qizi, Checheniston Bosh vaziri o‘rinbosari Ayshat Qodirovaga “Ahmad-Hoji Qodirov xotirasi” medali topshirilgan edi. Medalni Qodirovning o‘zi qiziga topshirgan.