Рамазон Темиров эртага UFC'даги юришини давом эттиради

Энг енгил вазн тоифасида UFC жангчиси Рамазон Темиров Лас-Вегасдаги турнир кардида америкалик Чарльз Жонсонга қарши октагонга кўтарилади.

Тошкент вақти билан 2 март тонгида Лас-Вегасда UFC Fight Night турнири старт олади. Мусобақанинг илк жангида энг енгил вазн тоифаси вакиллари ўзбекистонлик жангчи Рамазон Темиров америкалик Чарльз Жонсон октагонга чиқади. Бу Темиров учун промоушендаги иккинчи жанг бўлади.

Турнирнинг марказий жангида худди шу вазн тоифаси вакиллари португалиялик Манель Капе ва қозоғистонлик Асу Алмабаев октагонга кўтарилади.

Маълумот ўрнида, Рамазон Темиров UFC'даги илк жангини 2024 йилнинг октябрида ўтказган ва ўшанда Сижей Вергарани нокаутга учратган. Жонсон эса промоушенда 10 та жанг ўтказган ва шундан 7 та ғалаба, 3 мағлубият қайд этган. Жонсон кетма-кет 4 та жангдан иборат ғалабали серия қайд этиб келмоқда.

Турнир Тошкент вақти билан 2 март куни 2:00 старт олади.