Путиннинг Украина билан тинчлик ўрнатиш истаги йўқ – ISW

Россия Президенти Владимир Путин Украинани “демилитаризация” қилиш орқали уни таслим этмоқчи ва унда урушни тўхтатиш нияти йўқ. Бу ҳақда Американинг Урушни ўрганиш институти (ISW) экспертлари хабар берди.

Институт экспертларининг фикрича, Владимир Путин Украинага қарши урушда тинчликка эришмоқчи эмас ва унинг Виктор Орбан билан учрашувидан сўнг, Венгрия Бош вазири ўзини бу масалада воситачи сифатида кўрсатишга ҳаракат қилмоқда.

“Путин урушни тўхтатиш ва тинчлик келишувини имзолаш ўрнига Украинани “демилитаризация” орқали таслим бўлишини ва Россия ҳозирда ишғол қилишга улгурмаган муҳим ҳудудларни ҳам эгаллашни талаб қилади”, деб ёзади ISW таҳлилчилари.

Мутахассислар Путиннинг икки кун кетма-кет Украинага қарши урушда ўт очишни тўхтатиш имкониятини рад этганига ҳам эътибор қаратди. Украина ҳам, Россия ҳам бир-бирини ўртада тузилган сулҳдан қўшинларни қайта тўплаш ва қайта қуроллантириш учун фойдаланишни кўзлаганликда айбламоқда.

Маълумот ўрнида, жорий йилнинг 5 июнь куни Орбаннинг Москвага ташрифини шарҳлар экан, ISW таҳлилчилари Венгрия Бош вазири афтидан Ғарб эътиборини Украинага ҳарбий ёрдам кўрсатишдан тинчлик музокаралари имкониятларига чалғитмоқчи эканлигини таъкидламоқда.

Эслатиб ўтамиз, аввалроқ Венгрия Бош вазири Виктор Орбан Москвадан қайтишда самолёт бортида берган интервьюсида Россия Президенти Владимир Путинни оқилона ва пунктуал шахс эканлигини билдириб, агар буни 100 фоиз кўрсаткичда баҳолаш керак бўлса, бу керагидан ҳам ортиқ эканлигини айтганди.