Путин Зеленскийга Москвада 100 фоизлик хавфсизлик кафолатини ваъда қилди (видео)

Агар Москва шаҳрида учрашув бўладиган бўлса, Россия Украина Президенти Владимир Зеленскийга хавфсизликни 100 фоиз кафолатлайди. Бу ҳақда бугун, 5 сентябрь куни Россия раҳбари Владимир Путин Шарқий иқтисодий форумда сўз очди.

“Украина томони бу учрашувни истаяпти ва уни таклиф қилмоқда. Марҳамат, келаверинглар, биз иш олиб бориш учун шароитни ҳам, хавфсизликни ҳам мутлақо таъминлаймиз. Кафолат 100 фоизлик”, дейди у.

Путин, шунингдек, Зеленский билан бошқа жойларда учрашув ўтказиш ҳақидаги таклифларни “ортиқча” деб ҳисоблашини айтган.

“Агар кимдир биз билан ростдан ҳам учрашишни истаса, биз тайёрмиз. Бунинг учун энг яхши жой Россия Федерацияси пойтахти, қаҳрамон шаҳар Москва”, дейди Россия Президенти.

Эслатиб ўтамиз, Россия ва Украина раҳбарлари учрашувига тайёргарлик ҳақида АҚШ Президенти Дональд Трамп Путин билан Аляскадаги учрашуви ва Зеленский ҳамда Европа раҳбарлари билан Оқ уйдаги саммитидан сўнг эълон қилган эди. Зеленский музокараларни Европанинг нейтрал ҳудудида, масалан, Швейцария ёки Австрияда, ёки Туркияда ўтказишни таклиф қилган.

Путин эса учрашувни Москвада ўтказиш таклифини илгари сурган, бироқ Зеленский буни рад этган. Жорий йилнинг 3 сентябрь куни Россия Президенти ўз таклифини очиқ эълон қилди.

“Дональд мендан, агар имкон бўлса, шундай учрашувни ўтказишни сўради. Агар Зеленский Москвага келишга тайёр бўлса, бундай учрашув бўлади”, деган эди у. Шу билан бирга, Россия раҳбари бундай учрашувда маъно борлигига шубҳа билдирган.

Украина Ташқи ишлар вазири Андрей Сибига эса Путиннинг Зеленскийни музокара ўтказиш учун Москвага чорлови қабул қилиб бўлмайдиган таклиф эканини айтди. Сибиганинг сўзларига кўра, камида етти давлат Украина ва Россия Президентларининг учрашувига мезбонлик қилишга тайёр. Уларга Австрия, Ватикан, Швейцария, Туркия ва Форс кўрфазидаги уч давлат киради.