Путин Ўзбекистон Бош прокурорини мукофотлади

Россия Президенти Владимир Путин Ўзбекистон Бош прокурори Ниғматилла Йўлдошевни “Дўстлик” ордени билан мукофотлади. Путиннинг шу ҳақдаги тегишли фармони эълон қилинди.

Ниғматилла Йўлдошев 1962 йил 5 ноябрь куни Тошкент шаҳрида туғилган. Тошкент давлат университетининг юриспруденция факультетини тамомлаган. У фаолияти давомида прокуратура терговчиси, Бош прокуратурада бошқарма бошлиғи, Президентнинг ҳуқуқни муҳофаза қилувчи ва назорат идоралари фаолиятини мувофиқлаштириш бўйича Давлат маслаҳатчиси хизматининг прокуратура идоралари фаолияти масалалари бўйича етакчи инспектори, Бош прокурор ўринбосари, Адлия вазири, Сенат Раиси лавозимларда ишлаган.

2016 йил 2 сентябрда Ўзбекистон Республикасининг Биринчи Президенти Ислом Каримовнинг вафотидан кейин Конституцияга кўра, Олий Мажлис палаталарининг қарори билан Ўзбекистон Президенти вазифасини вақтинча бажарувчи этиб тайинланганди. 2016 йил 8 сентябрь куни эса Президент ваколатларини бажариш масъулиятини вақтинчалик бош вазир Шавкат Мирзиёевга топширишини эълон қилган. 2019 йил 20 июнь куни Ўзбекистон Республикаси Президенти Шавкат Мирзиёев фармони билан Бош прокурор этиб тайинланган. 

Ўзбекистон қонунчилигига кўра, Бош прокурорнинг ваколат муддати 5 йилни ташкил қилади. Ниғматилла Йўлдошев ваколат муддати 2024 йилда тугагани сабабли Бош прокурор лавозимини кўриб чиқиш масаласи Сенатда муҳокама қилиниб, у лавозимга қайта тайинланди. Жорий йил августда Йўлдашевга 2-даражали давлат адлия маслаҳатчиси махсус унвони берилди. 

Эслатиб ўтамиз, Россия Президенти Владимир Путин ўтган йилнинг 18 ноябрь куни Ўзбекистон халқ артисти Фаррух Зокировни  “Дўстлик” ордени билан мукофотлаш тўғрисидаги фармонни имзолаганди. Жорий йилнинг 29 май куни Зокировга Россия Федерациясининг “Дўстлик” ордени топширилди. 

2022 йилда эса Ўзбекистон Олий Мажлиси Сенати раиси Танзила Норбоева Россия Президенти Владимир Путин номидан “халқлар ўртасидаги ҳамкорлик ва ўзаро ҳамжиҳатликни мустаҳкамлашга қўшган улкан ҳиссаси учун” “Дўстлик” ордени билан тақдирланганди. Орденни Норбоевага Россия Федерацияси Федерация кенгаши спикери Валентина Матвиенко 28 октябрь куни Самарқандда бўлиб ўтган МДҲ Парламентлараро Ассамблеяси сессиясининг ялпи мажлисида топширганди. Ўшанда Норбоева “Бу орденга албатта муносиб бўламиз” (Мы этот орден обязательно отработаем), деб ваъда берганди.