Путин Украинага баллистик ракета билан зарба берилганини тасдиқлади
Олам
−
09:007099
Кеча, 21 ноябрь куни Россия ўзининг ўрта масофали “Орешник” ракетасини Украинадаги объектга қарата учирди. Бу ҳақда Россия Президенти Владимир Путин ўзининг телевизион мурожаатида маълум қилди.
Путин Россия ўзини мамлакат ҳудудига қарата қурол ишлатаётган давлатларнинг ҳарбий объектларига қарши қурол ишлатишга ҳақли деб ҳисоблашини айтган.
“Россия Қуролли кучлари 21 ноябрь куни Украина ҳарбий-саноат мажмуаси объектларидан бирига ҳужум уюштирди. Россиянинг энг янги ўрта масофали ракета тизимларидан бири ҳам жанговар шароитларда синовдан ўтказилди. Ушбу ҳолатда, ядровий бўлмаган гипертовушли жиҳозланган баллистик ракетадан фойдаланилди”, дейди Путин.
Унинг сўзларига кўра, синовлар муваффақиятли ўтган, армия кўзланган мақсадга эришган. Хусусан, Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган.
Путинга кўра, Россия Америка ва Британияда ишлаб чиқарилган қуролларнинг мамлакат ҳудудига ҳужумларига жавобан “Орешник”дан фойдаланган.
Эслатиб ўтамиз, олдинроқ Украина Мудофаа кучлари биринчи марта ATACMS баллистик ракеталари билан Россия ҳудудига ҳужум қилганди.
Live
Барчаси