Путин Украинага ҳужум қилмасликка ваъда берди – Макрон

north_east

Макрон Путиннинг ҳафсаласи пир бўлган учрашувдан мамнун. У Украинага йўл олмоқда

Россия-Украина можароси ортидан кеча, 7 февраль куни Москвада Президент Владимир Путин билан музокаралар олиб борган Франция Президенти Эммануэль Макрон бугун, 8 февраль куни амалий ташриф билан Украинада бўлиб тургани ҳақида хабар берган эдик.

Украина раҳбари билан учрашган Макронга кўра, Россия Украинага ҳужум қилмайди. Унинг билдиришича, кеча музокаралар давомида Путин Украинага ҳужум амалга оширилмаслиги ҳақида сўз берган. 

“Менга ҳеч қандай кескинлашув ёки ҳужум бўлмаслиги ҳақида ваъда беришди”, деган Макрон Владимир Зеленский билан учрашув аввалида. 

Маълумот учун, кеча Франция ва Россия раҳбарлари ўртасида ўтказилган музокаралар 6 соатдан ортиқ давом этган.

Макроннинг таъкидлашича, “кечаги музокаралар икки томон ўртасида эришиладиган келишув учун ҳал қилувчи роль ўйнайди”. 

Бундан ташқари, томонлар хавфсизлик масаласида ҳали яна музокараларни давом эттиришади. Путин ҳам томонлар муросага келаётгани ва Макрон илгари сурган таклифлар янги қўшма ҳаракатлар учун асос бўлишини таъкидлаган.

Расмий Парижнинг очиқлашича, Ғарб ва Москва ўртасида Россиянинг чегарадаги ҳарбийлари, Украина билан боғлиқ вазият ва Коллектив хавфсизлик масаласида кенг қамровли музокаралар ўтказилади. 

Аммо Кремль ҳозирча музокаралар ҳақида ортиқча маълумотларни очиқламади. Путиннинг Матбуот котиби Дмитрий Песковга кўра, Россия чегарадаги қўшинларини ортга қайтаради, аммо, унинг айнан қачон содир бўлиши ноаниқ. 

Бундан ташқари, Москва умуман уруш бўлмаслиги ҳақидаги хабарларни тасдиқлагани йўқ.