Путин Украина уруши бошланганидан бери биринчи марта Курскка борди

Кеча, 12 март куни Россия Президенти Владимир Путин Курск вилоятидаги бошқарув штабларидан бирига борди. У жамоатчиликка ҳарбий формада кўриниш берди. Бу ҳақда Кремль хабар берди.

Қайд этилишича, Путин Россия Федерацияси Қуролли кучлари генерал штаби бошлиғи ва Мудофаа вазири биринчи ўринбосари Валерий Герасимов ва минтақа армияси қўмондонлари билан йиғилиш ўтказган. У Украина билан тўлиқ масштабли уруш бошланганидан бери илк бор ҳарбий камуфляж кийимда, ҳеч қандай фарқловчи белгилари бўлмаган ҳолда омма олдида пайдо бўлган.

Герасимов Путинга Украинанинг Курскка ва Россия ҳудудларига қаратилган ҳужумлари тўхтатилгани, украин қўшинлари катта йўқотишларга учраганини маълум қилган. Шунингдек, Россия кучлари ҳозирда Курск вилояти ҳудудининг 86 фоизини эгаллаганини ва украин ҳарбийлари бирин-кетин таслим бўлаётганини билдирган.

Путин армияга Украина қўшинларини қисқа муддатда буткул тор-мор этиш ва Украина билан чегарада хавфсизлик ҳудудини яратиш вазифасини қўйган. Шунингдек, у Курск вилоятидаги жангларда иштирок этаётган ҳарбий бўлинмаларни ҳамда чеченларнинг “Ахмат” ихтиёрий тузилмасини миннатдорлик билан тилга олган.

Президент, шунингдек, Россия ҳудудидаги Украина қўшинларини “террорчилар” сифатида баҳолаш ва тегишли моддалар бўйича судга тортиш кераклигини таъкидлаган. Унинг сўзларига кўра, Украина томонида жанг қилаётган хорижий ёлланма аскарлар Женева конвенциясида кўзда тутилган ҳарбий асирлар ҳуқуқидан фойдалана олмайди. Женева конвенциясига кўра, уруш давомида асир олинган ҳарбийлар махсус ҳуқуқларга эга бўлади:

Уларни қийнаш, таҳқирлаш ёки ноинсоний муносабатда бўлиш тақиқланган.
Уларга тиббий ёрдам кўрсатилиши керак.
Асирлар уруш тугагач, ватанларига қайтарилиши керак.

Агар ёлланма аскарлар Женева конвенциясига мувофиқ ҳарбий асирлар сифатида тан олинмаса, бу уларнинг ҳуқуқлари ҳимоя қилинмаслигини, Россия томони уларни жиноий жавобгарликка тортиши мумкинлигини англатади.
Маълумот учун, Украина Курск вилоятига ҳужумни 2024 йил август ойида бошлаган эди. Киев ушбу ҳужум орқали келгуси тинчлик музокараларида устунликка эришиш ва Россияни Украина шарқидаги фронтдан диққатини тортишга мажбур қилишни мақсад қилганини билдирган.

Эслатиб ўтамиз, ўтган йил охирида Путин Курск раҳбарини алмаштирганди.