Путин Сочида ўзи учун янги қароргоҳ қурдирди – ОАВ

Сочида Россия Президенти Владимир Путиннинг бузиб ташланган “Бочаров ручей” қароргоҳи ўрнида янги комплекс қурилиши якунланмоқда. Бу ҳақда BBC хабар берди.

Нашрнинг аниқлашича, ишлар Федерал хавфсизлик хизматининг (ФХХ) давлат мудофаа буюртмаси асосида олиб борилмоқда. 2026 йилнинг кузида олинган сунъий йўлдош тасвирларида янги корпус томлари кўриниб турибди. Қурилиш якунланаётганидан, шунингдек, бу йил ички пардозлаш – ёритгичлар, сантехника ва эшикларни ўрнатиш бўйича мутахассислар қидирилгани ҳам далолат беради. BBC’нинг қайд этишича, янги комплекс аввалгисига қараганда анча каттароқ майдонни эгаллайди.

Давлат мудофаа буюртмаси бўйича шартномалар ҳақидаги маълумотлар ёпиқ, аммо пудратчилар ўртасидаги низо бўйича суд қарорларидан баъзи тафсилотларни аниқлашга муваффақ бўлинган. Қурилишнинг бош пудратчиси “Трансстройинвест компаниялар гуруҳи” (ТСИ КГ) аннексия қилинган Қримда рўйхатдан ўтган. Ишларнинг салмоқли қисми супудратчиларга топширилган, улар орасида аннексия қилинган Севастопольдаги “Военморпроект-30” лойиҳа институти, Оренбургнинг “СК Башня”, Москва вилоятининг “Ренмедиа” компаниялари бор.

“Трансстройинвест компаниялар гуруҳи”нинг бенефициари сифатида ОАВ маълумотларига кўра Путиннинг дўсти Аркадий Ротенберг билан боғлиқ бўлган 47 ёшли девелопер Алексей Фоменко тилга олинади. 

Эски “Бочаров ручей” қароргоҳини бузиш 2024 йилда бошланган ва 2025 йил сентябрига келиб унинг ўрнида котлован ҳосил бўлган. Бузилиш ва унинг сабаблари ҳақида расман хабар берилмаган. Аввалги комплексдан фақат 2014 йилги Олимпиадага қадар қурилган “Бочаров ручей-2” корпуси қолган. Умуман олганда, Россия жанубига дронлар ҳужуми фонида Путиннинг Сочига ташрифлари сони сезиларли даражада камайган: 2024-2025 йилларда у шаҳарга фақат тўрт марта ташриф буюрган.

2026 йилда ФХХ “Бочаров ручей” ҳимоясини кучайтиришга ва унинг атрофида майдони уч квадрат километрдан ортиқ бўлган қўриқланадиган ҳудуд яратишга қарор қилган.