Путин собиқ канцлер билан учрашди 

Россия Президенти Владимир Путин Германиянинг собиқ канцлери Герхард Шрёдер билан Кремлда яккама-якка учрашув ўтказди. Бу ҳақда Кремлнинг ташқи сиёсат бўйича маслаҳатчиси Юрий Ушаков маълум қилди. 

Россия ахборот агентликлари келтирган маълумотларга кўра, Ушаков учрашувни “яхши ва дўстона” руҳда ўтган деб таърифлаган. 

“Учрашув дўстона руҳда ўтди ва мулоқот бирга-бир форматда бўлди. Очиғини айтсам, унинг тафсилотларини билмайман. У Москвада, Кремлда бўлиб ўтди”, деган Ушаков журналистлар билан суҳбатда. 

Унинг айтишича, Россия вакиллари турли йўналишларда кўплаб норасмий алоқаларни давом эттирмоқда. 

“Мен жуда яхши тасаввур қила оламанки, норасмий алоқалар жуда кўп ва биз уларнинг аксарияти ҳақида шунчаки билмаймиз”, деган Кремль вакили. 

Маълумот учун, Герхард Шрёдер 1998–2005 йилларда Германия канцлери лавозимида ишлаган. Унинг раҳбарлигидаги Германия Социал-демократик партияси 2005 йилги сайловларда мағлуб бўлгач, у сиёсатдаги фаолиятини якунлаган. Шундан сўнг, Шрёдер Россиянинг давлат компанияларида фаолият юрита бошлади ва Владимир Путин билан яқин муносабатлар ўрнатди. Айнан шу алоқалар сабаб у узоқ йиллардан буён Германия ва Европада танқидларга учраб келади. 

Путин ўтган ой Европа учун янги хавфсизлик тизими бўйича музокаралар олиб боришга тайёрлигини билдирган ва бу жараёнда ўзининг афзал кўрган ҳамкори сифатида Шрёдерни тилга олган эди. Бироқ Брюсселда йиғилган Европа Иттифоқи ташқи ишлар вазирлари Шрёдернинг бундай музокараларда иштирок этиш ғоясини рад этган. Европа Иттифоқининг ташқи сиёсат бўйича олий вакили Кая Калласнинг таъкидлашича, бу ҳолатда собиқ канцлер музокаралар столининг ҳар икки томонида ўтирган одамга айланиб қолади. 

Юрий Ушаков, шунингдек, ўзининг норасмий алоқалари ҳақида омма олдида маълумот бермаслигини айтган. Бу алоқалар қаторида Украина можароси билан шуғулланаётган АҚШнинг махсус вакиллари Стив Уиткофф ва АҚШ Президенти Доналд Трампнинг куёви Жаред Кушнер билан мулоқотлар ҳам бор.

Кремль вакили АҚШ дипломатик саъй-ҳаракатлари ҳозирда асосан Эрондаги вазиятга қаратилганини қайд этган. Шунга қарамай, Стив Уиткофф ва Жаред Кушнернинг Москвага навбатдаги ташрифи устида иш олиб борилаётганини маълум қилган. 

“Уларнинг Москвага ташрифи тайёрланмоқда, бироқ аниқ саналар ҳали келишиб олинмаган”, деган Ушаков.

Эслатиб ўтамиз, аввалроқ Европа давлатлари россияликларга виза беришни қийинлаштираётгани ҳақида хабар берилган эди.