Путин Россия ва Украина орасидаги даллол БАА Президентига сим қоқди

Бугун, 24 март куни Россия Президенти Владимир Путин Бирлашган Араб Амирликлари Президенти Шайх Муҳаммад бин Зоид Ол Наҳаён билан телефон орқали мулоқот қилди. Бу ҳақда Кремль хабар берди.

Маълум қилинишича, Путин Россия ва Украина ўртасида ушлаб турилган шахслар алмашинувини амалга оширишда БАА томонидан кўрсатилаётган фаол воситачилик ёрдами учун миннатдорлик билдирган.

Шунингдек, давлат раҳбарлари Украина можаросини тинч йўл билан ҳал қилиш йўлларини излаш ва Москва ҳамда Вашингтон ўртасидаги икки томонлама алоқаларни нормаллаштириш мақсадида Россия-АҚШ мулоқотининг ҳозирги ривожланишини муҳокама қилган. Муҳаммад Ол Наҳаён Россия ва АҚШ томонидан амалга оширилаётган саъй-ҳаракатларни қўллаб-қувватлашини билдирган ва бугун Ар-Риёдда бўлиб ўтаётган икки мамлакат эксперт гуруҳларининг маслаҳатлашувларини олқишлаган.

Владимир Путин ва Муҳаммад Ол Наҳаён Россия-БАА стратегик шериклик муносабатларида эришилган даражани ижобий баҳолаган ҳамда савдо-иқтисодий ва гуманитар соҳаларда ўзаро манфаатли лойиҳаларни амалга оширишни давом эттириш тарафдори эканини билдиришган.

Қолаверса, Россия раҳбари Муҳаммад Ол Наҳаён ва бутун Амирлик халқини мусулмонлар учун муқаддас бўлган Рамазон ойи билан табриклаган.

Эслатиб ўтамиз, бугун, 24 март куни Саудия Арабистони пойтахтида америкалик воситачилар Россия ва Украина делегациялари билан алоҳида музокаралар ўтказаётгани, чунки Вашингтон уч йилдан ортиқ давом этган урушдан сўнг Москва ва Киев ўртасида чекланган сулҳга эришмоқчи экалиги ҳақида хабар берилганди. Учрашув матбуот учун ёпиқ тарзда ўтказилган.