Путин музокара учун Ватиканга ҳам бормоқчи эмас

north_east

Путин Трамп билан нимага келишганини айтди (видео)

Россия Президенти Владимир Путин яқин келажакда Ватиканда ёки бошқа жойда Украина бўйича тинчлик музокараларида қатнашмайди. Бу ҳақда Россия расмийларига таяниб, кеча, 22 май куни “Bloomberg” агентлиги хабар берди.

Кремль 16 май куни Истанбулда бошланган техник даражадаги музокараларга эътибор қаратишни афзал кўрмоқда. Сиёсатшунос Сергей Марковга кўра, Путин НАТО мамлакати Италияга “хавфсизлик нуқтаи назаридан” бормайди, шунингдек, Россия Ватиканни можарода нейтрал томон деб ҳисобламайди.

Ватиканнинг музокаралар жараёнидаги иштироки рус православ черковида ҳам шубҳа уйғотади – у Муқаддас тахтга Украинадаги “тарихий рақиб” сифатида қарайди, шунингдек, Москва Патриархатининг Украина православ черковларини ёпиб қўйган Киев ҳукуматини танқид қилмаётгани учун уни қоралайди.

“Bloomberg” агентлигининг Кремлга яқин уч манбасига кўра, Москва Туркияни бўлажак тинчлик меморандуми шартларини муҳокама қилиш платформаси сифатида афзал кўради. Европалик юқори мартабали амалдорлардан бири Россиянинг Туркияни танлаши ва 2022 йилги музокаралар Россиянинг “биринчи квадратга қайтиш” ниятидан дарак бериши мумкинлигини таъкидлади.

Агентлик манбалари, шунингдек, ҳозирда АҚШ музокараларни осонлаштириш учун Киев билан алоқада эканини ва шу билан бирга, 2022 йилда ва жорий йилнинг 16 май куни Истанбулдаги музокараларда Россия делегациясига раҳбарлик қилган Россия Президенти ёрдамчиси Владимир Мединский каби қаттиққўл тарафдорларнинг маслаҳатлашувларда иштирок этиши маъқул эмаслиги ҳақида Москвага ишора қилмоқда.

Қайд этиш жоиз, учрашувни Ватиканда ўтказиш ғоясини АҚШ Президенти Дональд Трамп илгари сурган. Кейинчалик бу ташаббусни янги понтифик папа Лео XIV қўллаб-қувватлади.

21 май куни Финляндия Президенти Александр Стубб ўт очишни тўхтатиш бўйича музокаралар келаси ҳафтадаёқ Ватиканда ўтказилиши мумкинлигини айтди.

“The Washington Post” газетасининг ёзишича, Италия ўз вакилларини музокараларда иштирок этиши учун йўл ажратишга тайёрлиги ҳақида Москвани хабардор қилган, бироқ бу Халқаро жиноий суд (ХЖС) ордери остидаги Путинга ҳам тааллуқли бўладими-йўқми, ҳозирча аниқ эмас. Италия ХЖСнинг юрисдикциясини тан олади ва Рим статутини ратификация қилган.

Муросасиз позициялар

16 май куни Истанбулда 2022 йилдан бери илк бор Россия ва Украина делегацияларининг учрашуви бўлиб ўтди. “The Economist” нашрининг ёзишича, Москва тўрт минтақа – Донецк, Луганск, Херсон ва Запорожье вилоятлари устидан назорат ўтказилишини талаб қилган, аммо ҳалигача тўлиқ қўлга кирита олмаган.

Нашр манбаларига кўра, Владимир Мединский агар ён беришлар рад этилса, Россия “чексиз курашишга” тайёрлигини очиқ айтган. Музокаралар ҳеч қандай аниқ тинчлик келишувларисиз якунланган. Украина ҳар қандай ҳудудий имтиёзлар эҳтимолини қатъиян рад этган.

Кўп ўтмай, 19 май куни Путин ва Трамп ўртасида икки соатлик телефон суҳбати бўлиб ўтди, аммо бу ҳам ютуқ келтирмади. “The Financial Times” нашрининг ёзишича, бундан АҚШнинг европалик ва украиналик ҳамкорларининг ҳафсаласи пир бўлган.

Нашр манбаларига кўра, Трамп бундан буён воситачи сифатида фаол роль ўйнаш ниятида эмаслигини ва Россия ва Украинага ўзлари келишувга келиш имкониятини беришини аниқ айтган.

“The Wall Street Journal” (WSJ) 21 май куни учта манбага таяниб хабар беришича, АҚШ Президенти Дональд Трамп Владимир Путин билан телефон суҳбати якунлари бўйича Европа етакчиларига Россия Президенти Украинадаги урушни тўхтатиш нияти йўқлигини, чунки у урушда ғалаба қозонаётганига ишонганини маълум қилган.

Нашрнинг ёзишича, Европа етакчилари Путин тинчликни хоҳламаслигини тахмин қилган, бироқ улар ўз тахминларининг тасдиғини Трампдан биринчи марта эшитган. Шу билан бирга, Трампнинг сўзлари Путин гўёки тинчликка чин дилдан интилаётгани ҳақидаги оммавий баёнотларига зид эди.