Путин Медведевни янги лавозимга тайинлади

Россия Президенти Владимир Путин ўзи бошқарадиган Ҳарбий-саноат комиссиясида ўзининг биринчи ўринбосари лавозимини таъсис этди. Ушбу лавозимга Россия Федерацияси Хавфсизлик кенгаши раҳбари ўринбосари Дмитрий Медведев тайинланди. Бу ҳақда ТАСС хабар берди 

Давлат раҳбарининг кеча, 26 декабрь куни эълон қилинган фармонига кўра, комиссия таркибидан чиқариб юборилган Игорь Артемьев (собиқ Федерал Монополияга қарши кураш хизмати раҳбари) ўрнига Фавқулодда вазиятлар вазирлиги раҳбари Александр Куренков ҳам қўшилган. 

Россия Президенти комиссия раиси ҳисобланади. Шунингдек, унинг таркибига Бош вазир ўринбосари – Саноат ва савдо вазирлиги раҳбари Денис Мантуров киради. У комиссия раҳбарининг ўринбосари ва унинг ҳайъати раҳбари (жорий масалаларни ҳал қилиш учун тузилган) лавозимларини эгаллайди. 

Шунингдек, комиссия таркибига Мудофаа вазири Сергей Шойгу, Бош штаб раҳбари Валерий Герасимов, Хавфсизлик кенгаши котиби Николай Патрушев, Ташқи разведка хизмати, Федерал хавфсизлик хизмати, Миллий гвардия раҳбарлари ва бошқалар киради.