Путин Кимни медаль билан тақдирлади

Россия Федерацияси Президенти Владимир Путин Корея Халқ Демократик Республикаси (КХДР) раиси Ким Чен Инни “Ғалабанинг 80 йиллиги” медали билан тақдирлади. Бу ҳақда Россиянинг КХДРдаги элчихонаси Telegram-каналида хабар берилди. 

Қайд этилишича, бугун, 27 март куни Россиянинг КХДРдаги элчиси Путин томонидан берилган медални Ким Чен Инга топширган.

“27 март куни “Мансуде” қурултойлар саройида Россия Федерацияси Президентининг 2024 йил 2 сентябрдаги фармонига биноан Ким Чен Ин “1941-1945 йиллардаги Буюк Ватан уруши Ғалабасининг 80 йиллиги” медали билан тақдирланди. Ушбу мукофот КХДР ҳудудида ҳалок бўлган ва дафн этилган совет фуқароларининг хотирасини абадийлаштиришга қўшган катта шахсий ҳиссаси учун топширилди”, дейилади хабарда.

Мукофотни Россиянинг КХДРдаги фавқулодда ва мухтор элчиси Мацегора КХДР Олий халқ йиғини президиуми раисининг ўринбосари Кан Юн Сокга топширган. Кан Юн Сок КХДР раҳбари Ким Чен Ин номидан ушбу мукофот учун миннатдорлик билдирган. У, шунингдек, ушбу мукофот Россия ва КХДР ўртасидаги кенг қамровли стратегик ҳамкорликнинг юксак даражасини яна бир бор тасдиқлаганини таъкидлаган.

Мукофот топшириш маросимида КХДР Ташқи ишлар вазирининг ўринбосари Ким Чжон Гю, шунингдек, Россия элчихонасининг ҳарбий атташеси генерал-майор Бартусов, катта дипломатик ходимлар ва ҳарбий атташеннинг офицерлари иштирок этган.

Эслатиб ўтамиз, аввалроқ Владимир Путин словениялик Артем ва Анна Дулцевларни яширинча “Жасорат” ордени билан тақдирлади. Дулцевларнинг мукофотланиши тўғрисидаги маълумотлар ҳеч қандай жойда ошкор этилмаган. Бироқ “Агентство” нашри Россия Ташқи разведка хизматининг “Разведчик” журналининг декабрь сонида чоп этилган материалга эътибор қаратган.