Путин илк бор Жўлоний билан гаплашди

Бугун, 12 февраль куни Россия Президенти Владимир Путин Суриянинг ўтиш даври президенти Аҳмад аш-Шара (Абу Муҳаммад ал-Жўлоний) билан телефон орқали суҳбатлашди. Бу ҳақда Кремль матбуот хизмати хабар берди.

Қайд этилишича, Россия раҳбари аш-Шарага олдинда турган вазифаларни ҳал этишда муваффақиятлар тилаган.

“Владимир Путин Аҳмад аш-Шарага Россия билан тарихан дўстлик ва ўзаро манфаатли ҳамкорлик алоқаларини ўрнатган Сурия халқи манфаати йўлида мамлакатнинг янги раҳбарияти олдида турган муаммоларни ҳал этишда муваффақиятлар тилади”, дейилади хабарда.

Шунингдек, Путин Россия Суриядаги вазиятни яхшилашга ёрдам беришда, жумладан, гуманитар ёрдам кўрсатишда давом этишга тайёрлигини тасдиқлаган.

“Суриядаги мавжуд вазият юзасидан атрофлича фикр алмашилди. Владимир Путин Россия Суриядаги ижтимоий-иқтисодий вазиятни яхшилаш, жумладан, унинг аҳолисига гуманитар ёрдам кўрсатишда ёрдам беришга тайёрлигини тасдиқлади”, дейилади расмий хабарда.

Қолаверса, суҳбат давомида савдо-иқтисодий, таълим ва бошқа соҳалардаги амалий ҳамкорликнинг бир қатор долзарб масалалари кўриб чиқилган

“Икки томонлама ҳамкорликни ривожлантириш бўйича кенг кўламли кун тартибини ишлаб чиқиш учун ушбу турдаги фойдали алоқаларни давом эттиришга келишиб олинди”, дейилади хабарда.

Эслатиб ўтамиз, 29 январь куни Сурия пойтахти Дамашқ шаҳрида Россия ва Сурия вакиллари билан бўлган учрашувда Суриянинг янги етакчиси Аҳмад аш-Шара Россия вакилларидан собиқ президент Башар Асадни топширишни талаб қилганди. Дамашқ вакиллари қўшимчасига мамлакатдаги фуқаролар урушида Асадни қўллаб-қувватлаган Россия томонига “товон тўлаши” кераклигини билдирган.