Путин бутунлай ақлдан озган – Трамп

north_east

Россия тунда Киевга дрон ва баллистик ракеталар билан ҳужум қилди

АҚШ Президенти Дональд Трамп Россия Президенти Владимир Путиннинг Украинадаги ҳаракатларидан норози эканини билдирди ва Россияга қарши санкциялар жорий этилиши эҳтимоли ҳақида мутлақо жиддий ўйлаётганини маълум қилди. Бу ҳақда у ўзининг Truth Social ижтимоий тармоғида ёзди.

“Мен ҳар доим Владимир Путин билан жуда яхши муносабатда бўлганман, аммо энди у билан нимадир содир бўлди. У бутунлай ақлдан озган! У шунчаки одамларни ўлдирмоқда. Нафақат аскарларни, балки оддий одамларни ҳам. Ракеталар ва дронлар ҳеч қандай сабаб бўлмасдан Украина шаҳарлари устига ёғдирилмоқда”, деб ёзди Трамп.

У, шунингдек, Путиннинг мақсади бутун Украинани эгаллаш бўлиши мумкинлигини таъкидлади.

“Мен доим у бутун Украинани хоҳлайди деб айтганман, фақат бир қисмини эмас. Ва эҳтимол, бу ҳақиқат бўлиб чиқади. Аммо агар у бундай қилса, бу Россиянинг қулашига олиб келади!” деди Трамп.

Шунингдек, у Россияга нисбатан санкциялар жорий этилиши эҳтимолини “мутлақо кўриб чиқаётганини” маълум қилган.

Бундан ташқари, Трамп Украинани ҳам тилга олиб, Президент Владимир Зеленскийни танқид остига олган. Унинг фикрича, Зеленский мамлакатидаги “муаммоларни ўзи яратмоқда”.

Қайд этиш жоиз, ушбу баёнот Трампнинг аввалги изоҳлари билан солиштирганда кескин оҳангда чиқди. Илгари у Россияга қарши санкцияларни эҳтиёткорлик билан муҳокама қилган ва Путин билан шахсий алоқалари яхши эканини урғулаган эди.

Эслатиб ўтамиз, Трамп 19 май куни Путин билан телефон орқали суҳбатлашганини ва можаро бўйича муросага эришиш имкониятини кўраётганини айтган эди. Унга кўра, санкциялар жорий этилса, вазият янада ёмонлашиши мумкин. Шунга қарамай, у “балки келажакда санкциялар вақти келар” деб истисно этмаганди.