ПСЖ Европанинг энг буюк жамоаси – Макрон (видео)

Франция Президенти Эммануэль Макрон кетма-кет иккинчи бор Чемпионлар лигаси ғолибига айланган “Пари Сен-Жермен” (ПСЖ) футболчиларини Елисей саройида қабул қилиб, жамоани Европанинг энг буюк клуби деб атади. Бу ҳақда “Euro football” хабар берди.

“Сиз бизни сўнгги сониягача ҳаяжонда ушлаб турдингиз. Ўтган йилги финалдаги йирик ғалабадан фарқли равишда, бу сафар 120 дақиқадан ортиқ вақт давомида асабийлашдик. Қандай ажойиб жамоа!” деган Макрон.

У, шунингдек, Франция жамоа сабаб тарихий натижага эришганини ҳам алоҳида урғулаган.

“ПСЖ туфайли Франция икки йил ичида 70 йил давомида эриша олмаган натижага эришди ва икки марта Чемпионлар лигаси ғолибига айланди. Бунинг учун сизларга раҳмат. Бу ПСЖ, Париж ва бутун Франция учун улкан фахрдир”, деган Макрон.

Франция Президенти футболчиларнинг матонатини ҳам алоҳида таъкидлаган.

“Ҳар бирингиз охиригача курашдингиз. Ҳеч ким таслим бўлмади. Сизлар бирлик, характер ва етуклик намунасини кўрсатдингиз. Охирги сониягача таранглик сақланиб қолди. Бу энг буюк жамоага хос белги. Ҳеч қандай шубҳа йўқки, ПСЖ бугунги кунда Европанинг энг буюк жамоасидир”, дея хулоса қилган Макрон.

Маълумот учун, 30 май куни бўлиб ўтган финалда пенальтилар сериясида ПСЖ 4:3 ҳисобида “Арсенал”дан устун келиб, Чемпионлар лигаси кубогини қўлга киритди. Шу тариқа парижликлар кетма-кет иккинчи мавсум Европанинг энг нуфузли клублар турнирида зафар қучди.

Эслатиб ўтамиз, аввалроқ Европа Чемпионлар лигаси финалида “Пари Сен-Жермен” (ПСЖ)нинг ғалабасидан сўнг Франция пойтахти Парижда оммавий тартибсизликлар юз берганди. Маълумотларга кўра, бир киши ҳалок бўлган, яна бир киши комага тушган, 219 киши жароҳатланган ва қарийб 800 киши қўлга олинган.