Президентнинг тадбиркорлар билан очиқ мулоқоти бошланди

Бугун, 18 август куни Президент Шавкат Мирзиёев Хоразмда тадбиркорлар билан очиқ мулоқот ўтказмоқда. Бугунги анжуманда илк бор туман студияларидан ҳам 25 мингга яқин тадбиркор иштирок этмоқда. Бу ҳақда Президент матбуот котиби маълум қилди.

Қайд этилишича, давлат раҳбари мамлакат иқтисодий қудратини мустаҳкамлашга фаол ҳисса қўшаётган 1 миллион 200 минглик бизнес ҳамжамиятини Тадбиркорлар куни билан табриклаган.

Беш йил олдин тадбиркорлар билан очиқ мулоқот ўтказиш анъанаси бошланганидан буён бизнесга тўсиқ бўлган минглаб масалаларга ечим берилган. Бу борада 84 та қонун, 861 та фармон ва қарор қабул қилинган.

“Нима учун? Тадбиркорларимизга шароит яратиб, янги иш ўринларини кўпайтириш, одамларимизни узоққа бормасдан, маҳалласининг ўзида даромадли қилиш учун!” дейди Президент.

Ўтган даврда бизнес учун ажратилган кредит портфели қарийб 3 карра ошиб, 450 триллион сўмга етган. Тадбиркорлар 650 триллион сўмлик солиқ ва божхона имтиёзларидан фойдаланган.

Кўплаб бизнес вакиллари хорижий банклардан ўз лойиҳаларига мустақил равишда 1 миллиард доллар жалб қилган. Давлат раҳбари буни тадбиркорларимиз забт этган яна бир улкан марра сифатида баҳолаган.