Президент Uzbekistan Airways’га чипталар нархи ошишининг олдини олиш бўйича топшириқ берди

Президент Шавкат Мирзиёев Uzbekistan Airways авиакомпаниясига чипталар нархи ошишининг олдини олиш юзасидан топшириқ берди. Бу ҳақда кеча, 27 март куни авиакомпания раиси Шуҳрат Худойқулов Президентнинг хусусийлаштириш масалалари бўйича ўтказган йиғилишидан кейин “Ўзбекистон 24” телеканалига берган интервьюсида сўз очди. 

Шуҳрат Худойқуловга кўра, Президент бухгалтерия ҳисобининг миллий стандартларидан Молиявий ҳисоботнинг халқаро стандартларига ўтишни топширган. Бу эса келгусида компанияга харажатларни капиталлаштиришга, шунингдек, чипталар нархини ушлаб туришга, бозорда мослашувчан ва аҳоли учун қулай бўлишга имкон беради.

Шунингдек, Мирзиёев авиакомпанияга авиачипталар нархини оширмаслик ва бу жараённи маълум даражада назорат қилиш вазифасини қўйган.

Бундан ташқари, Худойқулов миллий авиакомпания олдига халқаро бозорда акцияларни оммавий жойлаштириш (IPO) бўйича жиддий вазифа қўйилганини таъкидлади. Билдирилишича, мазкур жараён билан Uzbekistan Airways қошида ташкил этилган трансформация офиси шуғулланмоқда.

Эслатиб ўтамиз, 2022 йил декабрь ойида Шавкат Мирзиёев Uzbekistan Airways акциядорлик жамиятини трансформация қилишга оид таклифлар тақдимоти билан танишган эди. Ўшанда авиакомпанияга халқаро тажриба асосида корпоратив бошқарув тизимини жорий этиш, ҳаво кемаларини кўпайтириш, хизматлар сифатини ошириш ва юк ташиш тармоғини кенгайтириш чоралари кўрилиши, хорижий инвесторларни жалб этган ҳолда авиакомпанияни жаҳон стандартлари асосида хусусийлаштириш ишлари якунига етказилиши айтилганди.