Президент қароримни қўллаб-қувватлаганидан хурсандман – Норов нафақага чиққани ҳақида 

Собиқ ташқи ишлар вазири, Марказий Осиё халқаро институти директори Владимир Имомович Норов нафақага чиққани ҳақида ўз Twitter саҳифасида изоҳ қолдирди.

“Давлат идоралари ва хорижий дипломатик миссияларда 45 йиллик фаолиятимдан сўнг нафақага чиқишга қарор қилдим. Президент Шавкат Мирзиёев бу қароримни қўллаб-қувватлаганидан чин дилдан миннатдорман”, деб ёзган у Twitter саҳифасида.

Маълумот учун, Владимир Норов 1955 йил 31 август куни Бухоро вилоятида туғилган. 1972-1976 йилларда Бухоро педагогика институтини тамомлаган. 1983-1985 йилларда Совет Иттифоқи ички ишлар вазирлиги академияси тингловчиси бўлган. Бошқарув лавозимларидаги фаолиятига тўхталадиган бўлсак, у 2022 йил 27 апрелдан 30 декабргача икки марта Ўзбекистон Ташқи ишлар вазирлигини бошқарган. 2019 йил 1 январдан 2021 йил 31 декабргача Шанхай ҳамкорлик ташкилоти Бош котиби, 2017 йил 5 майдан 2018 йил 31 декабргача Ўзбекистон Республикаси Президенти ҳузуридаги Стратегик ва минтақалараро тадқиқотлар институти директори – Ўзбекистон Республикаси Президенти ҳузуридаги Хавфсизлик кенгаши котибининг биринчи ўринбосари, 1996-1998 йилларда Ўзбекистон Республикаси Президентининг давлатлараро муносабатлар ва ташқи иқтисодий алоқалар масалалари бўйича давлат маслаҳатчиси каби лавозимларда фаолият юритган. Бундан ташқари, Ўзбекистоннинг Германия, Польша, Швейцария, Люксембург ва Бельгиядаги собиқ элчиси бўлиб ишлаган. Норов 2022 йил 30 декабрдан ҳозиргача Марказий Осиё халқаро институти директори вазифасида ишлаб келаётган эди.

Эслатиб ўтамиз, жорий йилнинг 16 июнь куни Марказий Осиё халқаро институти ходими QALAMPIR.UZʼга Владимир Норов нафақага чиққанини маълум қилган эди.