Prada Versace’ни 1,25 млрд еврога сотиб олди

Италиянинг машҳур мода уйи Prada Group модалар дунёсидаги яна бир йирик бренд Versace’ни 1,25 миллиард евро эвазига сотиб олди. Бу ҳақда WWD ва “Vogue Business” нашрлари хабар берди.

Маълумотларга кўра, Versace бренди Capri Holdings концернига тегишли бўлиб, у ҳозирги кунда Michael Kors ва Jimmy Choo каби брендларга ҳам эгалик қилади. Ҳозирги келишув ҳали мувофиқ идоралар томонидан тасдиқланиши лозим.

Prada Group бош директори Андреа Герра бу харид гуруҳ учун “ўзгача ва тўлдирувчи янги қирра” қўшишини таъкидлаган. Шу билан бирга, у Versace брендининг салоҳияти юқори бўлишига қарамай, “олдинда узоқ ва мураккаб йўл” кутилаётганини айтган.

Мутахассисларнинг фикрича, келишув нархига 2 апрелда АҚШ Президенти Дональд Трамп томонидан жорий этилган қўшимча божлар ҳам таъсир қилган. АҚШ Италиядан келадиган товарларга 20 фоизлик бож белгилади. Илгари Versace 1,6 миллиард долларга баҳоланган бўлса, божлардан сўнг унинг нархи 1,38 миллиард долларгача тушгани айтилмоқда.

Capri Holdings гуруҳининг молиявий ҳолати ҳам маълум роль ўйнаган: Versace сўнгги ҳисобот даврида 15 фоиз даромад йўқотган (193 миллион доллар), бутун гуруҳнинг даромади эса 11,6 фоизга камайган. Таҳлилчилар брендга янги ривожланиш стратегияси кераклигини таъкидламоқда.

Маълумотларга кўра, Versace’нинг сотилиши Донателла Версаче компанияни тарк этганидан кейин амалга ошган. Бу ҳам бренднинг стратегик йўналишини ўзгартириш зарурати билан боғланган бўлиши мумкин.

“Vogue”нинг таъкидлашича, Versace Capri Holdings’нинг Tapestry билан қўшилишига АҚШнинг Федерал савдо комиссияси (FTC) тўсқинлик қилганидан сўнг сотувга қўйилган. Шундан кейин Capri ўз стратегиясини ўзгартириб, асосий эътиборни Michael Kors брендига қаратган. Айни вақтда компания Jimmy Choo бренди учун ҳам харидор изламоқда.

Қайд этиш жоиз, Capri Holdings (ўшанда Michael Kors Holdings) 2019 йил январь ойида Versace’ни 2,1 миллиард доллардан ортиқ суммага харид қилган.

Versace модалар уйи 1978 йилда Жанни Версаче томонидан таъсис этилган. У ўзининг жасур, рамзий ва гламур дизайни билан бутун дунёда машҳурликка эришган. Аммо 1997 йили Жанни Версаче вафот этганидан сўнг, унинг синглиси Донателла Версаче бренд раҳбарлигини ўз зиммасига олган ва креатив директор сифатида унинг эстетикасини давом эттирган. Донателла нафақат брендини сақлаб қолган, балки уни XXI асрга уйғунлаштиришга ҳам муваффақ бўлган. Аммо жорий йил март ойида Донателланинг бренддан кетиши ҳақида маълум қилинди. 

Prada уйи эса 1913 йилда Миланда ташкил этилган. Ушбу бренд аввалига чемодан ва чарм буюмларни ишлаб чиқарган бўлса-да, кейинчалик юқори даражадаги замонавий модага айланган. Компанияни ҳозирда Миучча Прада бошқаради – у 1980 йилларда брендга интеллектуал, минималистик ва инновацион руҳ олиб кирган. Бугунги кунда Prada’нинг 80 фоиз акциялари ҳали ҳам асосчилар оиласига тегишли.