Porsche ўзининг энг секин тракторлари пойгасини ўтказди

Porsche автомобиллар ишлаб чиқарувчи компанияси ўзининг энг секин тракторлари пойгасини ўтказди. Бу ҳақда “Formacar” нашри хабар берди. 

Porsche деганда одамларнинг кўз олдида замонавий ва кучли спорт автомобиллари гавдаланади. Аммо йигирманчи асрнинг ўрталарида компания тракторлар ишлаб чиқарган. Фердинанд Порше томонидан тақдим этилган дастлабки учта прототип 1934 йилда заводдан чиққан. Улар бензинли двигателлар билан жиҳозланган эди.

Иккинчи жаҳон урушидан кейин қишлоқ хўжалиги соҳасида аллақачон фаол бўлган немис компанияларига ишлаб чиқаришни қайта тиклашга рухсат берилди. Собиқ Zappelin заводида 125 мингдан ортиқ Porsche тракторлари йиғилган. Аммо 1963 йилда ишлаб чиқариш тўхтатилган. Орадан олтмиш йил ўтиб, 1950-60 йилларда қишлоқ хўжалигидаги асосий техника бўлган ушбу тракторлар Laguna Seka (АҚШ)даги Rennsport Reunion'ида рақобатлашади.

Гап шундаки, компания қишлоқ хўжалиги учун техникалар ишлаб чиқарган даврлар хотираси учун ҳар йили Калифорнияда ноодатий ва қизиқарли трактор пойгаларини ўтказади.

Бундай пойгалар Porsche автомобиллари қатнашадиган пойгалар орасида энг секини ҳисобланади. Аммо улар доимо томошабинлар эътиборини тортади. 

Иштирокчи техникалар максимал 25 км/соат тезликда ҳаракатланади. Бу шунчалик секинки, пойгачилар машиналарнинг устида туриб, томошабинларга қўл ҳам силкийди. Шунингдек, улар орасида машҳур шахслар ҳам талайгина. Хусусан, Vintage тракторларини кинорежиссёр ва ҳайдовчи Жефф Зварт, собиқ пойгачи Йорг Бермейстер ва собиқ Формула 1 ҳайдовчиси Фелипе Наср каби профессионал пойгачилар бошқаради. 

Пойгадаги энг қизиқ жиҳатлардан яна бири, унда тракторларнинг ноодатий кўринишдагилари ҳам учраб туришидир. Хусусан, бу йил ўтказилган пойгада пойабзални эслатувчи ноёб Coffee Train PZ12 ҳам бор. Ушбу модель Бразилия қаҳва плантациялари учун кичик партияда ишлаб чиқарилган.

Эслатиб ўтамиз, Абу-Даби шайхи ўзига одатдагидан уч баробар катта Hummer ясатиб олди.