Порошенконинг суди қолдирилди

Киевнинг Печерский туман суди Украина собиқ Президенти Пётр Порошенкога нисбатан эҳтиёт чораси эълон қилиниши режалаштирилаётган йиғилишни эртага, 19 январь куни давом эттиради. Тегишли қарор кеча, 17 январь куни кечқурун қабул қилинди. Бу ҳақда “Прямой” телеканали хабар берган.  

Унга кўра, учрашув маҳаллий вақт билан 19 январь соат 14:00 (Тошкент вақти билан 17:00) га кўчирилган. 

Порошенконинг адвокатлари собиқ Президентга қўйилган барча айбларни ноқонуний деб атаган ва суддан Порошенкога нисбатан эҳтиёт чорасини танламасликни сўраган. Шу вақт давомида мамлакатнинг бешинчи Президенти тарафдорлари суд деворлари олдида уни қўллаб-қувватлаш учун митинг ўтказган. Учрашув кейинга қолдирилгани маълум бўлгач, Порошенко йиғилганларга мурожаат қилиб, 17 январни амалдаги Президент Владимир Зеленскийнинг “аҳмоқона популистик даври тугаши” санаси деб атаган. 

Украинанинг собиқ раҳбари 2014-2015 йилларда Донбассга кўмир етказиб бериш бўйича жиноий ишда айбланувчи ҳисобланади. Иш Украина Жиноят кодексининг “Терроризмни молиялаштириш”, “Давлатга хиёнат” ва “Террорчи ташкилот тузиш” моддалари бўйича қўзғатилган. Порошенкони мол-мулки мусодара қилинган ёки мусодара қилинмаган ҳолда 15 йилгача қамоқ жазоси кутмоқда. 

Эслатиб ўтамиз, 17 январь куни Порошенко Варшавадан Киевга етиб келди.