Польша Украинага ўз аскарларини юбормайди – Туск

Варшава Украинага ўз ҳарбийларини тинчликпарвар миссия доирасида юбориш ниятида эмас, бироқ бундай қарор қабул қиладиган давлатларга логистика ва сиёсий жиҳатдан ёрдам беришга тайёр. Бу ҳақда Польша Бош вазири Дональд Туск бугун, 17 февраль куни берган баёнотида сўз очди.

“Бизнинг Украинага Польша қўшинларини юбориш режамиз йўқ, лекин бундай кафолатлар беришни истаган давлатларга логистика ва сиёсий жиҳатдан ёрдам кўрсатамиз”, деди у.

Қайд этилишича, Польша Бош вазири 2024 йил декабрида ҳам ўз қўшинларини Украинага жўнатиш эҳтимолини рад этган. Маҳаллий матбуотнинг ёзишича, Варшава тарихий сабабларга кўра бундай миссияда иштирок этишдан манфаатдор эмас – Иккинчи жаҳон урушидан олдин ҳозирги Ғарбий Украинанинг бир қисми Польшага тегишли бўлган.

Бунга жавобан Буюк Британия Бош вазири Кир Стармер Украинага британ тинчликпарвар қўшинларини юборишга тайёр эканлигини билдирган. ОАВ хабарига кўра, у бу ташаббусни Франция Президенти Эммануэль Макрон билан муҳокама қилган. Шу билан бирга Франция Ташқи ишлар вазири Жан-Ноэль Барро Британия, Франция ва Польша ҳарбийларини юбориш бўйича музокаралар олиб борилаётганини иддао қилган.

Германия ҳукумати эса тинчликпарвар кучлар жўнатиш бўйича муҳокамаларга “эрта” деб ҳисоблайди.

“Аввал Украинада қандай йўл билан тинчлик ўрнатилишини кўриш керак. Шундан сўнг биз шароитни баҳолаймиз ва қайси чора-тадбирларни амалга ошириш мумкинлигини муҳокама қиламиз”, дейди Германия ҳукуматининг расмий вакили ўринбосари Кристиан Хоффман.

Маълумот учун, январь ойида Украина Президенти Владимир Зеленский Россия билан ҳарбий можаронинг тартибга солиниши доирасида Европадан камида 200 минг тинчликпарвар ҳарбий юборилиши зарур бўлишини таъкидлаган.

Бироқ “The Financial Times” газетаси ўша пайтда Украина расмийлари 40-50 минг хорижий ҳарбийни жалб қилишни муҳокама қилганини хабар қилган. Бу кучлар 1000 км узунликдаги фронт чизиғида хавфсизликни таъминлашга қаратилган бўлиши керак.

Эслатиб ўтамиз, аввалроқ Буюк Британия собиқ мудофаа вазирлари Грант Шэппс ва Гэвин Уильямсон ҳарбий ҳаракатлар тугаганидан кейин Украинага “тинчликпарвар қўшинлари”ни юбориши кераклигини айтган эди. Шэппснинг сўзларига кўра, Британия “Путиннинг ноқонуний босқинига қарши” Украинани қўллаб-қувватлашда биринчи ўринда бўлган ва Лондон энди Киевга НАТОга аъзо бўлишида ёрдам бериши керак.