Польша Бош вазири Эрдўғаннинг совғаси сабаб қамалиши мумкин

Польша Бош вазири Дональд Тускка рўйхатдан ўтмаган совға учун жиноий иш қўзғатилиши ва унга 3 йилгача қамоқ жазоси тайинланиши мумкин. Бу ҳақда “Rzeczpospolita” хабар берди.

Маълум қилинишичга, гап Туркия Президенти Ражаб Тойиб Эрдўғаннинг совғаси ҳақида кетмоқда. Газета маълумотларига кўра, Туркия раҳбари Тускка ноёб тарихий ёдгорлик – Польша канцлери Анжей Зелиньскийнинг 1745 йилда Усмонли империясининг бош вазирига йўллаган мактубини совға қилган. Совға сурати Туск томонидан унинг Х ижтимоий тармоғидаги саҳифасига жойлаштирилган.

Мамлакат қонунларига кўра, Бош вазир совғани олгандан кейин 30 кундан кечиктирмай рўйхатдан ўтказиши керак эди. Туркия Президенти совға қилган мактуб билан боғлиқ ҳолатда эса бундай қилинмаган. Амалдор томонидан қимматбаҳо совғани давлат реестрига киритмаслик, Польша қонунларига кўра, уч йилга озодликдан маҳрум қилиш билан жазоланади.

Ўз навбатида, Польша ҳукуматининг ахборот маркази оммавий ахборот воситаларининг рўйхатдан ўтказилмаган совға ҳақидаги хабарларига жавобан Туск томонидан олинган ёдгорлик “Тускнинг ўзи учун эмас, балки Польша халқи учун совға эканлигини маълум қилган”.

Эслатиб ўтамиз, жорий йилнинг 5 май куни номаълум шахс Нидерландия Бош вазири Дик Схоф ва Польша Бош вазири Дональд Тускка Нидерландиянинг Вагенинген шаҳрида бўлиб ўтган мемориал тадбирда чиқиш қилаётган чоғда тутунли граната улоқтирган эди.