Польша АҚШдан ядро қуроли сўради

Польша Президенти Анжей Дуда АҚШдан Россиянинг бўлажак агрессиясидан тўхтатувчи восита сифатида Польшада ядро қуролини жойлаштиришни сўради. Бу ҳақда у “Financial Times” газетасига берган интервьюсида сўз очди.

Дуда Россия Беларусга тактик ядро қуролларини жойлаштирганини таъкидлаб, Дональд Трамп ҳам Ғарбий Европа ёки АҚШда жойлашган ядро каллакларини Польшага кўчириши мумкинлигини таклиф қилган.

Унинг айтишича, у яқинда Трампнинг Украина бўйича махсус вакили Кит Келлог билан бу ғояни муҳокама қилган. Шунингдек, Дуда 2022 йилда АҚШнинг собиқ президенти Жо Байден маъмурияти даврида муваффақиятсизликка учраган ядровий алмашиш бўйича таклифни жонлантиришга умид қилмоқда. 

“Россия ўз ядровий қуролларини Беларусга кўчиришда ҳеч иккиланмади, ҳеч кимдан рухсат сўрамади. НАТО чегаралари 1999 йилда шарққа кўчди, шунинг учун 26 йил ўтгач, НАТО инфратузилмаси ҳам шарққа силжиши керак”, дейди Дуда.

Бу таклиф Ғарб етакчилари ва разведка агентликларининг Европада келаси беш йил ичида кенг кўламли уруш бўлиши мумкинлиги ҳақида огоҳлантиришлари кучайган пайтда пайдо бўлган.

Қайд этиш жоиз, ўша пайтдаги Россия мудофаа вазири Сергей Шойгу ва унинг беларуслик ҳамкасби Виктор Хренин 2023 йилнинг май ойида Польшанинг қўшниси бўлган Беларусга тактик ядро қуролларини топшириш бўйича келишув имзолаганди.

Россиянинг тактик ядровий қуроллари Европа ва Осиёдаги жанг майдонида фойдаланиш учун мўлжалланган ва стратегик ядровий қуролларга қараганда АҚШга етиб бориши мумкин бўлган масофадан анча чекланган.

Россия Президенти Владимир Путин 2022 йил февралида кенг кўламли босқин бошланганидан бери Украина ва Ғарбга бир неча бор ядровий таҳдидлар билан чиқди. Гарчи бу таҳдидлар амалга ошмаган бўлса-да, Россиянинг Украинадан ташқаридаги ҳарбий амбицияларидан хавотирлар сақланиб қолмоқда.

Франция Президенти Эммануэль Макрон ҳам ядро сиёсатидаги ўзгаришларга ишора қилиб, жорий йилнинг 5 март куни Франция Европа Иттифоқидагиларини ҳимоя қилиш учун ядровий соябонини кенгайтиришга очиқлигини айтди. 

Эслатиб ўтамиз, аввалроқ АҚШ ҳарбий-ҳаво кучларига тегишли иккита B-52H Stratofortress ядровий қурол ташишга қодир бомбардимончи самолёти Буюк Британиянинг Фэрфорд авиабазасига етиб борган эди. Улар Шимолий Дакотадаги Майнот авиабазасида жойлашган 69-бомбардимон эскадрильясининг таркибига киради. Яқин кунларда Буюк Британияга яна иккита шундай самолёт етиб келиши кутилмоқда. Ҳозирча уларнинг жойлаштирилишига оид батафсил маълумот берилмаган.

Бунёд Келдибоев