Покистонда 450 йўловчиси билан гаровга олинган поезд озод қилинди

Покистоннинг жануби-ғарбий қисмида “Балужистон озодлик армияси” жангари гуруҳи томонидан гаровга олинган поезддан 400 дан ортиқ йўловчи қутқарилди ва улар Кветтага етиб келди. Бу ҳақда “Associated Press” телеканали хабар берди.

Маълумотларга кўра, қутқарув операцияси давомида 21 нафар гаровга олинган шахс ва тўрт нафар махсус хизмат ходими ҳалок бўлган. Покистон хавфсизлик кучлари ҳужум уюштирган барча 33 жангарини йўқ қилган.

Ҳозирда Балужистон пойтахти Кветта темирйўл вокзалига етиб келган жабрланганлар ва қутқарув операцияси иштирокчиларига тиббий ёрдам кўрсатилмоқда.

Покистон Бош вазири Шаҳбоз Шариф вилоятга ташриф буюриши кутилмоқда. У ушбу ҳужумни “қўрқоқ ҳаракат” деб атаб, бундай ҳаракатлар “Покистоннинг тинчлик йўлидаги қатъиятига путур етказмаслигини” таъкидлаган.

Эслатиб ўтамиз, аввалроқ қуролли гуруҳ Балужистон провинциясининг тоғлар билан ўралган олис ҳудудида туннеллар яқинида поездга ҳужум қилгани ҳақида хабар берилган эди. Жангарилар темирйўл рельсларини портлатиб, поездни тўхтатган. Ушбу поезд Кветтадан Пешоварга кетаётган бўлган.

Шунингдек, ҳужумчилар олти нафар Покистон ҳарбийсини ўлдирган ва агар ҳукумат уларга қарши ҳарбий операция бошласа, гаровдагиларни қатл этишини билдирган. Шу билан бирга, жангарилар асирларни алмашиш бўйича музокараларга тайёр эканликларини ҳам маълум қилган.