Перуда ёнғин оқибатида бир оиланинг 10 аъзоси ҳалок бўлди (видео)

Перу пойтахти Лима шаҳрининг Ла Виктория туманида юз берган ёнғин оқибатида бир оиланинг 10 нафар аъзоси, жумладан, 5 нафар бола ҳалок бўлди. Бу ҳақда BBC хабар берди.

Полиция генерали Оскар Арриоланинг айтишича, ёнғин кеча, 22 июлдан 23 июлга ўтар кечаси маҳаллий вақт билан тахминан соат 03:00 да содир бўлган. Қурбонлар орасида ёши 3, 6, 6, 8 ва 15 бўлган беш нафар бола, шунингдек, 29 ёшдан 72 ёшгача бўлган беш нафар катта ёшли фуқаро бор. Шунингдек, яна икки киши тан жароҳати олган.

Маълумотларга кўра, ёнғин қасддан ўт қўйиш оқибатида келиб чиққан бўлиши мумкин. Маҳаллий ОАВнинг ёзишича, ҳалок бўлган оила матрас ишлаб чиқариш ҳамда электр мотоцикллар савдоси билан шуғулланган. Улар аввалроқ номаълум шахслар томонидан таҳдид ва товламачиликка учрагани, пул талаб қилинганини билдирган.

Гувоҳларнинг сўзларига кўра, номаълум шахслар уй ташқарисида турган мотоциклларга ўт қўйган. Аланга эса матрас ишлаб чиқаришда фойдаланилган тез ёнувчан материаллар орқали қисқа вақт ичида бутун бинога тарқалган.

Маълум қилинишича, ёнғин содир бўлган пайтда бинода оиланинг 17 нафар аъзоси бўлган. Улардан 7 нафари қутулишга муваффақ бўлган. Қурбонларнинг жасадлари кучли даражада куйганлиги сабабли уларни таниб олиш қийин бўлган.

“Бугун мамлакатимизни мотамга ботирган бу фожиа қаршисида бутун Перу сукут сақламоқда”, дейилади Перу Миллий полицияси баёнотида.

Билдирилишича, ҳуқуқ-тартибот идоралари ушбу ёнғин юзасидан тергов олиб бормоқда.

Эслатиб ўтамиз, аввалроқ Жазоир пойтахти яқинидаги болалар уйида содир бўлган ёнғин оқибатида камида 11 киши ҳалок бўлиб, яна 19 киши жароҳатланган эди.