Пашинян парламент сайловида овоз берди 

Аввалроқ, бугун, 20 июнь куни Арманистонда Миллий мажлисга (бир палатали парламент) муддатидан олдин сайловлар бўлиб ўтаётгани ҳақида хабар бергандик.  

Маълумотларга кўра, Арманистон Бош вазири вазифасини бажарувчи Никол Пашинян ҳам парламент сайловларида овоз берган. Таъкидланишича, Пашинян сайлов участкасига рафиқаси ва тўрт фарзанди билан келган. У овоз берган ва журналистларнинг саволларига жавоб бермасдан участкадан чиқиб кетган.  

Маълумот ўрнида, Арманистонда ўтган йилнинг ноябрь ойида бошланган сиёсий инқироз фонида Бош вазир ва парламентда вакили бўлган партиялар раҳбарлари муддатидан олдин сайловлар ўтказишга келишиб олганди. 

Жорий йилнинг 10 май куни бўлиб ўтган махсус йиғилишда депутатлар парламентни тарқатиб юборишни қонуний равишда амалга ошириш учун зарур расмиятчиликларга риоя қилганди. Шундан сўнг, мамлакат Президенти Армен Саркисян муддатидан олдин сайловлар кунини 20 июнга белгилаганди. 

Никол Пашинян ва унинг ҳукумати аъзолари сайловгача вазифа бажарувчи лавозимида ишлаб келди. Унинг “Фуқаролик шартномаси” партияси бошқа кучлар билан блоклар тузишдан бош тортган ва сайловларда мустақил қатнашмоқда. 

Мутахассисларнинг фикрига кўра, Пашиняннинг сайловдаги асосий рақибларидан бири Арманистоннинг собиқ Президенти Роберт Кочарян бўлади. У “Дашнакцутюн” ва “Қайта жонланаётган Арманистон” партиялари раҳбарлари Ишхан Сагателян ва Ваге Акопян билан биргаликда “Арманистон” блокини яратган. 

Сайловда Арманистон Миллий хавфсизлик хизматининг собиқ раҳбари Артур Ванецяннинг “Родина” партияси билан блок тузган экс-президент Серж Саргсяннинг Республикачилар партияси ҳам иштирок этмоқда. Шунингдек, парламент мухолифати — “Обод Арманистон” ва “Порлоқ Арманистон” партиялари ҳам сайловларда ҳеч қандай блокларга қўшилмасдан қатнашмоқда.