Парижда яна норозилик. Бу сафар фермерлар бош кўтарди

Бугун, 8 февраль куни француз фермерлари Европа Иттифоқининг энг йирик қишлоқ хўжалигида фермер хўжаликлари ишлаб чиқаришига таҳдид солаётган пестицид (заракунандаларга қарши қўлланиладиган кимёвий дорилар) чекловлари ва бошқа экологик қоидаларга қарши норозилик билдириш учун Парижга юзлаб тракторларни ҳайдаб кирди. Бу ҳақда “Reuters” хабар берди.

Қайд этилишича, фермерларнинг мазкур ҳаракатига Европа Иттифоқи судининг ўтган ойдаги қарори сабаб бўлган. Чунки ушбу қарор ортидан қанд лавлаги етиштирувчиларига Европа Иттифоқи томонидан тақиқланган инсектицид (зараркунанда ҳашаротларни йўқотиш учун ишлатиладиган кимёвий модда)дан фойдаланишга рухсат берувчи Франция сиёсати бекор қилинган. Бу эса лавлаги экишнинг янада қисқариши ва шакар заводларининг ёпилишидан хавотир уйғотган.

“Бизнинг ишлаб чиқариш воситаларимиз ечимсиз тақиқлар туфайли бузилмоқда”, дейди Франциянинг асосий фермерлар уюшмаси FNSEA бош котиби Жером Деспи.

“Макрон қишлоқ хўжалигини йўқ қилмоқда”, “Фермерингни асра” деган баннерлар осилган тракторлар марказий Париж бўйлаб юриб, Франция Қишлоқ хўжалиги вазирлиги ёнидаги Инвалидес ёдгорлиги олдидаги йиғилишга қўшилган. 

Бошқа тарафдан, атроф-муҳит фаоллари пестицидлар қолдиқлари тупроқ ва ёввойи табиатга зарар етказишини айтиб, Европа Иттифоқининг асалариларга зарар етказиши мумкин бўлган инсектицидлар билан ишлов берилган қанд лавлаги уруғларидан фойдаланишга қарши қарорини олқишлаган.

“Ердаги ҳаёт ва деҳқончилик учун ажралмас биохилма-хиллик қурбон қилинмаслиги керак”, дейди пестицидларга қарши “Generetions Futures” гуруҳи тақиқни қўллаб-қувватловчи баёнотида.

Фермерлар эса қанд лавлаги асалариларни ўзига жалб қилмаслиги ва тақиқ ўсимликнинг касалланишига олиб келишини айтмоқда. Бунинг оқибатида эса мамлакатда ишлаб чиқариш камайиб, импорт миқдори ортиши тахмин қилинмоқда.

Франция Қишлоқ хўжалиги вазирлиги эртага, 9 февраль куни қанд лавлаги сектори вакилларига режа тақдим этилишини маълум қилган. CGB қанд лавлаги етиштирувчилар гуруҳининг таъкидлашича, Қишлоқ хўжалиги вазири қанд лавлаги етиштирувчилари билан агар бу йил ўсимлик касалланиши ортидан ҳосил йўқотилса, фемерларнинг зарари тўлиқ қопланишига келишиб олган.

“Биз қониққанимиз йўқ, аммо ҳозирча бу фермерларга 2024-2025 йиллар учун экиш ва бошқа ечимларни топишга имкон бериши керак”, дейди CGB президенти Франк Сандер.

Алибек Бейжанов