Парагвай Беллингем юзасидан FIFA’га расмий шикоят йўллади

Парагвай футбол ассоциацияси Англия терма жамоаси ярим ҳимоячиси Жуд Беллингем юзасидан FIFA’га расмий шикоят йўллади. Бу ҳақда “The Mirror” нашри хабар берди.

Манбага кўра, мурожаат жорий йилнинг 24 июнь куни Англия ва Гана ўртасидаги 2026 йилги Жаҳон чемпионати гуруҳ босқичининг иккинчи тур учрашувидаги воқеа билан боғлиқ. 0:0 ҳисобида якунланган баҳсда Беллингем Гана ҳужумчиси Жордан Айюга мурожаат қилар экан, оғзини қўли билан ёпган.

Парагвай томони FIFA интизомий қоидаларни қўллашда изчилликка риоя этмаётганини таъкидламоқда. Уларга кўра, Парагвай ярим ҳимоячиси Мигел Альмирон мусобақа бошида Туркияга қарши ўйинда шунга ўхшаш имо-ишора учун тўғридан тўғри қизил карточка олган.

Мазкур қоида Жаҳон чемпионати арафасида Жанлука Престианни Винисиус Жуниорга нисбатан ҳақоратли сўз ишлатгани учун дисквалификация қилинганидан кейин жорий этилган эди.

Ҳакамлар Беллингемни майдонда жазоламасликка қарор қилди. Улар унинг ҳаракатини тажовузкор ёки можарони кучайтирувчи ҳолат, деб баҳоламаган.

Амалдаги FIFA қоидаларига кўра, бундай имо-ишора футболчилар ўртасидаги жанжал ёки тажовузкор мулоқот вақтида содир этилса, тўғридан тўғри қизил карточка кўрсатилиши мумкин.