Панама АҚШ кемалари учун имтиёз берилганини рад этди

north_east

Дастлаб Аляска каби “сув текинга” қўлга киритилган, аммо кейинчалик қўш-қўллаб Панамага топширилган канал тарихи

Аввалроқ, АҚШ Давлат департаменти ижтимоий тармоқларда Панама ҳукумати Америка кемаларини каналдан ўтганлик учун тўловлардан озод қилишга рози бўлгани ҳақида хабар берган эди. Бироқ Панама Давлат департаментининг даъвосини рад этди. Бу ҳақда Панама канали маъмурияти ижтимоий тармоқларда маълум қилди.

Департамент баёнотида дирекциянинг Вашингтон билан мулоқотга тайёрлиги таъкидланган.

“АҚШ Давлат департаментининг ҳисоботига жавобан, канал тарифлари ва бошқа тўловларни белгилаш ваколатига эга бўлган Панама канали маъмурияти ўз тариф сиёсатига ҳеч қандай ўзгартириш киритмаганини айтди”, дейилади баёнотда.

3 февраль куни АҚШ Давлат котиби Марко Рубио Панама шаҳрида Панама Президенти Хосе Раул Мулино билан учрашди. Ушбу ташриф фонида АҚШ Президенти Дональд Трамп Панама канали Хитойга берилмаган бўлса-да, унинг назорати остида эканини айтди.

“Шартнома бузилган. Ё Панама канали устидан назоратни қайта тиклаймиз, ёки жуда жиддий нарса юз беради”, деб таъкидлади Трамп.

Ўз навбатида, Мулино канал бошқаруви Панамада қолиши ва муҳокама қилинмаслигини таъкидлади.

“Панама каналининг суверенитети қайта кўриб чиқилмайди”, деди Мулино.

Бироқ шунга қарамай Рубионинг ташрифидан сўнг, Панама Хитой билан 2017 йилда “Бир камар, бир йўл” ташаббуси доирасида имзоланган ўзаро англашув меморандумини янгиласлигини эълон қилди.

Маълумот учун, Тинч океани ва Атлантика океанларини боғловчи Панама канали Панамага тегишли бўлиб, у ҳукуматдан мустақил ташкилот томонидан бошқарилади. Каналнинг узунлиги тахминан 77 км. Канал жаҳон савдосида стратегик роль ўйнайди ва жаҳон денгиз савдосининг қарийб 5 фоизини ўтказади. Панама канали Панама бюджетига йилига 2,5 миллиард долларга яқин даромад келтиради ва минтақадаги асосий геосиёсий бойлик бўлиб қолмоқда.