Озодбек Назарбеков бошчилигида бир гуруҳ санъаткорларга профессор унвони берилди

Ўзбекистон Республикаси Маданият вазири Озодбек Назарбеков, Ўзбекистон халқ артистлари Фаррух Зокиров, Гавҳар Зокирова, Алишер Икромов, Абдуҳошим Исмоиловга Юнус Ражабий номидаги Ўзбек миллий мусиқа санъати институти профессори илмий унвони берилди. 

Ўзбекистон Республикаси Вазирлар Маҳкамасининг 2020 йил 2 сентябрдаги “Юнус Ражабий номидаги Ўзбек миллий мусиқа санъати институти фаолиятини ташкил этиш тўғрисида”ги қарори 7-бандига мувофиқ, 2020/2021 ўқув йилидан бошлаб Ўзбекистон Республикаси Маданият вазирлиги тизимидаги олий таълим муассасаларида фаолият юритиб келаётган профессор-ўқитувчиларнинг ижодий фаолияти натижалари қуйидагиларга тенглаштирилган.

Жумладан, “Ўзбекистон Республикаси санъат арбоби”, “Ўзбекистон Республикаси халқ артисти”, “Ўзбекистон Республикаси халқ бахшиси”, “Ўзбекистон Республикаси халқ ҳофизи” фахрий унвонлари ― профессор илмий унвонига, “Ўзбекистон Республикасида хизмат кўрсатган артист”, “Ўзбекистон Республикасида хизмат кўрсатган маданият ходими” фахрий унвонлари ― доцент илмий унвонига тенглаштирилган.

Шундан келиб чиқиб, жорий йилнинг 26 июль куни Ўзбекистон давлат санъат ва маданият институтида миллий санъатимиз ривожига улкан ҳисса қўшаётган бир гуруҳ ижодкор зиёли ўқитувчилар илмий унвонлар билан тақдирланган.

Тантанали тадбирда санъат йўналишидаги устоз санъаткорларнинг 24 нафарига профессорлик илмий унвони гувоҳномалари, 27 нафарига доцентлик илмий гувоҳномалари тантанали топширилди. Профессорлик илмий унвонига лойиқ топилганлар сафида Ўзбекистон халқ артистлари Гаҳвар Матёқубова, Фаррух Зокиров, Ҳошимжон Исмоилов, Мавлуда Халилова, Замира Суюнова, Гавҳар Зокирова, Авазхон Ражабов, Мирхалил Маҳмудов, Усмонқул Азимов, Баҳром Қурбонов, Аҳмед Шукуров, Қўрқмас Сагатов, Алишер Икромов, Сойибжон Ниёзов, Ботир Расулов, Нормўмин Султонов, Омонилла Ризаев, Элдор Азизов, Эркинбой Рўзматов, Абатдай Каллиев, Оролмирзо Сафаров, Фурқат Абдувалиев бор.

Маълумот учун, Маданият вазири Озодбек Назарбеков Қирғиз-ўзбек халқаро университети ҳамда Ўзбекистон давлат санъат ва маданият институтининг фахрий профессори ҳисобланади. 

Шунингдек, Ўзбекистон ва Қорақалпоғистон халқ артисти, Туркманистонда хизмат кўрсатган артист фахрий унвонларига эга. “Эл-юрт ҳурмати” ордени билан тақдирланган.

Назарбеков Юнус Ражабий номидаги Ўзбек миллий мусиқа санъати институти ректори сифатида ҳам фаолият юритади.