Овоз Ғаниевники, аммо... – Бош прокуратура ўрганиш натижаларини эълон қилди

Ўзбекистон Республикаси Бош прокуратураси Шуҳрат Ғаниевнинг интернет тарқалган овози юзасидан ўтказилган текширув бўйича натижаларни эълон қилди. Унда шундай дейилади:

"Жорий йилнинг 10 декабрь куни Интернет нашрларида Фарғона вилояти ҳокими, сенатор Шуҳрат Ғаниевга тегишли ҳамда таҳдид мазмунидаги тарқалган аудиоёзувдаги ҳолатлар бўйича Бош прокуратура томонидан терговга қадар текширув ўтказилди.

Аниқланишича, ижтимоий тармоқларда Қува тумани Автошоҳбекати ёнидаги автомобиль йўлида тўпланиб турган тахминан 20-30 нафар фуқаролар томонидан электр ва газ таъминотида узилишлардан норозилик билдирилаётганлиги акс этган видеолавҳа тарқалган.

Вилоят ҳокимлигида ўтказилган селектор йиғилишида Ш.Ғаниев Қува туманидаги ҳолат бўйича туман ҳокимига юзланган ҳолда муомала маданиятидан четга чиқиб, таҳдидий ва қўпол сўзлар ишлатган. Ушбу ҳолат номаълум шахс томонидан ёзиб олиниб, тарқатилган.

Терговга қадар текширувда жорий йилнинг 2 декабрь куни бўлиб ўтган селектор йиғилишида Шуҳрат Ғаниев таҳдидий ва қўпол сўзларни ишлатганлиги аниқланди. 

Шуҳрат Ғаниевнинг сўзларида инсон ҳаётига ва соғлиғига тажовуз қиладиган реал таҳдид, яъни уларни амалга оширилишидан хавфсираш учун асослар мавжуд эмаслигини инобатга олиб, мазкур ҳолат юзасидан Жиноят-процессуал кодекси талаблари асосида жиноят иши қўзғатишни рад қилиш ҳақида қарор қабул қилинди.

Бироқ, Шуҳрат Ғаниев давлат ҳокимияти ва бошқаруви органи мансабдор шахси бўла туриб, Давлат бошқаруви  органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари талабларини бузганлигини инобатга олиб, унинг интизомий жавобгарлиги масаласини кўриб чиқиш учун Вазирлар Маҳкамасига хат юборилди".

Эслатиб ўтамиз, жорий йилнинг 14 декабрь куни тарқалган аудиоёзувда Қува тумани ҳокими ва Шуҳрат Ғаниев суҳбати акс этгани айтилган. Унда вилоят ҳокими туман ҳокимига блогернинг жанозасини ўқишни буюради.

Вилоят ҳокимлиги Матбуот хизмати аудиоёзувдаги овоз “пранкер”лар томонидан ўхшатилганини иддао қилди.