OpenAI агенти Австралия ҳукумати сайтини бузиб кирди

OpenAI томонидан ишлаб чиқилган сунъий интеллект агенти жорий йилнинг июнь ойида Австралия ҳукуматининг соғлиқни сақлаш маълумотлари порталига рухсатсиз кириб, айрим файллардан фойдаланган. Бу сунъий интеллект агентининг ҳукумат сайтини бузиб кириши билан боғлиқ илк маълум ҳолат бўлиши мумкин. Бу ҳақда “Reuters” хабар берди.

Қайд этилишича, агент Австралия ҳукуматининг тиббий статистика порталига кирган. Мазкур портал махфий бўлмаган соғлиқ маълумотлари ва статистикаси, жумладан, давлатнинг тиббиётга сарфлаган харажатлари ҳақидаги маълумотларни тақдим этади.

Австралия Бош вазири Энтони Албаниз ҳозирча мавжуд далиллар ҳукумат тармоғининг бошқа қисмларига зарар етказилганини кўрсатмаётганини айтган.

“Шунга қарамай, бу ҳолат мутлақо номақбул”, деган у Нью-Йоркда, БМТ Бош Ассамблеясида иштирок этаётган пайтида.

Албанизнинг сўзларига кўра, Австралия ҳукумати OpenAI Бош директори Сэм Альтманга ушбу ҳодиса юзасидан “ўта жиддий хавотир” билдирган. Бош вазир компаниянинг ҳукуматни хабардор қилишни кечиктирганидан ҳафсаласи пир бўлганини айтган.

Ҳозирда ҳукумат тизимлари нима сабабдан бузиб киришни ўз вақтида аниқлай олмагани ҳам текширилмоқда. Бундан ташқари, яна 3 та ҳукумат сайти OpenAI агентининг фаолиятидан зарар кўрган бўлиши мумкин.

“Савол шундаки, у маълумотларни йиғишга уринганида ушбу бошқа сайтларга ҳам кирганми?”, деган Бош вазир.

OpenAI ўтказган текширувда беморларнинг тиббий маълумотларига кирилганини тасдиқловчи далиллар аниқланмаган. Компания агент фойдаланган маълумотлар орасида умумлаштирилган соғлиқ статистикаси ва ички файл номлари бўлганини маълум қилган.

Компания баёнотида Австралиянинг бир нечта ҳукумат сайтлари ва хизматлари билан боғлиқ фаоллик аниқлангани айтилган. Унга кўра, сунъий интеллект моделлари жавобларни излашга уринган пайтда компания кўзда тутмаган айрим ҳаракатларни амалга оширган.

“Reuters”га кўра, Австралиядаги ушбу ҳолат OpenAI сунъий интеллект агентлари билан боғлиқ ноқонуний ёки рухсатсиз фаолиятни содир бўлганидан анча вақт ўтиб ошкор қилган бир қатор воқеаларнинг энг сўнггиси бўлган.

Айрим ҳолатларда бундай фаолият кеч аниқлангани сабабли хабар бериш чўзилган. Бошқа ҳолатларда эса компания дастлаб ҳодисани ошкор қилмасликка қарор қилган.

Масалан, июль ўрталарида очиқ кодли сунъий интеллект платформаси Hugging Face’га уюштирилган ҳужум тахминан бир ҳафта ўтиб аниқланган. Бу ҳолат тобора кучайиб бораётган AI моделларидан фойдаланиш билан боғлиқ хавфлар юзасидан глобал муҳокамаларни кучайтирган.

АҚШнинг айрим йирик AI компаниялари раҳбарлари, жумладан, Сэм Альтман ҳам саноат ривожланишини секинлаштиришга чақирган. Улар бундай агентларнинг назоратдан чиқиб кетиши жиддий киберҳужумларга олиб келиши мумкинлигидан хавотир билдирган.

Эслатиб ўтамиз, аввалроқ Google’нинг Gemini сунъий интеллект модели киберхавфсизлик синови вақтида интернетдан фойдаланиб, 3 та компаниянинг ҳимояланган тизимларига бузиб кирганди.